وزیر اعظم عمران خان نے کہا ہے کہ لاک ڈاؤن کورونا کا علاج نہیں بلکہ عارضی اقدام ہے۔

تفصیلات کے مطابق وزیر اعظم عمران خان کی زیر صدارت کوویڈ-19کی صورتحال کے حوالے سے اعلیٰ سطحی  اجلاس ہوا جس میں صحت کی سہولیات اور ہسپتالوں کی استعداد میں اضافے کے حوالے سے اقدامات  کا بھی جائزہ لیا گیا ۔

اس موقع پر  معاون خصوصی برائے صحت ڈاکٹر ظفر مرزا نے کورونا وائرس کے ملک بھر میں متاثرین کے اعدادوشمار،  مصدقہ کیسز، جغرافیائی پھیلاؤ  اور ٹیسٹنگ کی تعداد اور کیسز میں اضافے کے تناسب کے حوالے سے وزیراعظم کو بریفنگ دی۔

اجلاس  میں مستقبل کے اعدادو شمار اور بدلتی صورتحال کے مطابق ہسپتالوں میں بستروں کی دستیابی پر مشاورت کی گئی جبکہ طبی آلات کی فراہمی اور پیشہ ور عملے کی موجودگی یقینی بنانے کے حوالے سے امور پر گفتگو بھی کی گئی۔

اجلاس میں وزیرِ اعلیٰ پنجاب اور وزیر اعلیٰ خیبرپختونخواہ نے ٹرانسپورٹ کے حوالے سے عام آدمی کو درپیش مسائل سے آگاہ کیا اور کہا کہ ٹرانسپورٹ کی بندش سے عام آدمی کا کاروبار اور نقل و حرکت شدید متاثر ہوئی ہے۔

وزیر اعظم نے کہا کہ ہماری آبادی کو جس قدر خطرہ لاک ڈاؤن سے ہے اس سے کہیں زیادہ بھوک و افلاس ہے، ہمیں بھوک اور  وبا کی روک تھام کے حوالے سے  حفاظتی اقدامات میں توازن برقرار  رکھنا ہے جبکہ ہمیں اپنے فیصلے زمینی حقائق اور عوام کی حالت زار دیکھ کر کرنےہیں۔

عمران خان نے یہ بھی کہا کہ ہمیں ادراک ہے کہ کاروبار کی بندش سے  معیشت کو ناقابل تلافی نقصان پہنچا ہے اور جب تک ہماری معیشت بحال نہیں ہو جاتی، ہمارے غریب اور نادار طبقے کی مشکلات بھی بڑھیں گی۔

وزیر اعظم کا کہنا تھا کہ کورونا وائرس ایک حقیقت ہے ، کورونا کی روک تھام اور حفاظتی تدابیر  کے حوالے سے وضع شدہ قواعد و ضوابط پرعملداری کو ہر صورت ممکن بنانا ہے جبکہ عوام کی زندگی کو محفوظ بنانا ہے ،پولیس عوام  پر سختی کی بجائے دوستانہ رویہ اختیار کرے۔

کراچی کو اپنا حق ملنا چاہیے ، نجیب ہارون

عمران خان نے حفاظتی تدابیر پرعملدرامد  یقینی بنانے کے حوالے سے عوام دوست اور آگاہی پر مبنی طرز عمل اپنانے کی اہمیت پر زور دیا اور کہا کہ حفاظتی تدابیر اختیار کرنے کے حوالے سے زور زبردستی  اختیار کرنےکی بجائے عوام میں اس ضمن میں شعور اجاگر کیا جانا چاہیے۔

وزیراعظم نے ذرائع ابلاغ اور میڈیا نمائندگان کے عوامی آگاہی میں کلیدی کردار کا ذکر کرتے ہوئے میڈیا  کے کردار کو سراہاتے ہوئے کہا کہ میڈیا عوام کو حفاظتی تدابیر اختیار کرنے اور قواعد وضوابط پر عمل کرنے کی ترغیب دلانے میں مزید موثر کردار ادا کرے۔

اجلاس کی صدارت کرتے ہوئے وزیر اعظم عمران خان نے مزید کہا کہ لاک ڈاؤن کے حوالے سے حکومتی پالیسی نہایت واضح ہے جبکہ عوام کی زندگیوں کو غیر ضروری خطرے میں ڈالے بغیر سہولت فراہم کی جائے گی۔

 اجلاس میں وفاقی وزراء اسد عمر،  حماد اظہر،  سینٹرشبلی فراز،  مخدوم خسرو بختیار، سید فخر امام، مشیران ڈاکٹر عبدا لحفیظ شیخ، عبدالرزاق داؤد، معاون خصوصی لیفٹنٹ جنرل (ر) عاصم باجوہ،   ڈاکٹر ظفر مرزا، ڈاکٹر معید یوسف، چیئرمین این ڈی ایم اے، وزیر اعظم کے فوکل پرسن برائے کوویڈ-19 ڈاکٹر فیصل و دیگر سینئر افسران بھی شریک ہوئے جبکہ وزیر اعلی پنجاب سردار عثمان بزدار اور وزیر اعلی خیبر پختونخوا محمود خان نے بھی اجلاس میں ویڈیو لنک کے ذریعے شرکت کی۔