پاکستان نے بھارت کی طرف سے  دراندازی کے بے بنیاد الزامات مسترد کردیا ہے۔

تفصیلات کے مطابق ترجمان دفترخارجہ عائشہ فاروق نے اپنے ایک بیان میں بھارت کی طرف سے پاکستان پر دراندازی کے بے بنیاد الزامات مسترد کرتے ہوئے کہا کہ پاکستان پر نام نہاد لانچنگ پیڈز اور دراندازی کی کوششوں کے بھارتی الزامات جھوٹے اور من گھڑت ہیں ۔

اپنے بیان میں ترجمان دفترخارجہ نے کہا کہ دراندازی کی کوششوں کے بھارتی الزامات پاکستان کے خلاف بھارتی پروپیگنڈہ کا حصہ ہیں ۔

 عائشہ فاروق نے یہ بھی کہا کہ پاکستان ہمیشہ سے کہتا آیا ہے کہ بھارت یہ الزامات لگآ کر جموں کشمیر کی صورتحال سے دنیا کی توجہ ہٹانا چاہتا ہے،بھارت مقبوضہ کشمیر میں انسانی حقوق کی سنگین خلاف ورزیوں اور ریاستی دہشتگردی کا مرتکب ہے ۔

ترجمان دفترخارجہ کا کہنا تھا کہ بھارت ان الزامات کی آڑ میں فالس فلیگ آپریشن اور ایل او سی پر معصوم شہریوں کو نشانہ بنانا چاہتا ہے جبکہ بھارتی جھوٹ بے نقاب کرنے کیلئے پاکستان نے صحافیوں انسانی حقوق کی تنظیموں اور آزاد مبصرین کو ایل او سی کا دورہ کرایا ۔

عائشہ فاروق نے کہا کہ پاکستان نے بھارتی سفارتکاروں کو دعوت دی کہ وہ خود جا کر ان نام نہاد لانچنگ پیڈز کا معائنہ کریں جنہیں نشانہ بنانے کا دعویٰ بھارتی آرمی چیف نے کیا جبکہ پاکستان نے بھارتی سرکار سے مطالبہ کیا کہ مبینہ ٹارگٹس کے حوالے سے معلومات فراہم کرے۔

پاکستان نے بھارتی وزارت خارجہ کے بیان کو مسترد کردیا

ترجمان دفترخارجہ نے یہ بھی کہا کہ بھارتی سفارتکار جائے وقوعہ کے دورے کیلئے سامنے نہیں آئے لیکن بھارتی سرکار بھی پاکستان کو معلومات فراہم کرنے سے قاصر رہی کیونکہ بھارت نے اقوام متحدہ فوجی مبصر گروپ کو بھی ایل او سی اور کشمیر کے دورے کی اجازت نہیں دی ۔

انھوں نے کہا کہ پاکستان کی طرف سے آزاد کشمیر کے دورے کیلئے ایسی کوئی پابندی نہیں لگائی گئی اور پاکستان کی اپنی سرزمین کسی دوسرے کے خلاف استعمال ہونے کی اجازت نہ دینے کی پالیسی صاف اور واضح ہے ۔

 عائشہ فاروق کا کہنا تھا کہ پاکستان نے اقوام متحدہ سے باضابطہ کہا ہے کہ لانچنگ پیڈز کے حوالے سے بھارت سے معلومات حاصل کرے، اقوام متحدہ خود پاکستانی حکومت کے ساتھ ان معلومات کا تبادلہ کر کے حقائق جاںچ سکتا ہے۔

ترجمان دفترخارجہ عائشہ فاروق کا مزید کہنا تھا کہ جب دنیا ایک وبائی صورتحال کا سامنا کر رہی ہے ایسے میں امید ہے بھارت ذمہ داری کا مظاہرہ کرے گا، امید ہے ایسے وقت میں بھارت تشدد میں کمی اور سیز فائر معاھدہ کی پاسداری کرے گا۔