وزیراعظم عمران خان نے کہا ہے کہ کورونا وائرس کے باعث معیشت پر انتہائی منفی اثرات مرتب ہوئے ہیں۔

تفصیلات کے مطابق وزیراعظم عمران خان کی زیر صدارت آزاد جموں و کشمیر میں اجلاس منعقد ہوا، اجلاس میں کورونا وائرس کی صورتحال اور ترقیاتی منصوبوں میں پیشرفت کا جائزہ بھی لیا گیا۔

 اجلاس کے دوران وزیراعظم کا کہنا تھا کہ مشکل حالات کے باوجود ہم نے آزاد جموں و کشمیر کی بجٹ میں سالانہ گرانٹ میں کمی نہیں کی بلکہ اضافہ کیا ہے جبکہ وفاقی حکومت نے گلگت بلتستان اور بلوچستان کے بجٹ میں بھی منفی اور ناخوشگوار حالات کے باوجود کمی نہیں کی گئی ہے۔

انہوں نے کہا ہے کہ ہمیں احساس ہے کہ جب تک پسماندہ اور کم ترقی یافتہ علاقے ترقی نہیں کریں گے اس وقت تک پاکستان ترقی نہیں کرے گا۔

 آزاد کشمیر کے چیف سیکرٹری نے اجلاس کے دوران واضح کیا ہے کہ گزشتہ مہینوں میں آزاد جموں و کشمیر انتظامیہ کو  حکومت پاکستان کی طرف سے توقعات سے بڑھ کر مدد ملی ہے اور اس ضمن میں حکومت آزاد جموں و کشمیر حکومت پاکستان کی تہہ دل سے شکر گزار ہے۔

وزیر اعظم آج مظفرآباد کا دورہ کریں گے

دوسری جانب صدر اور وزیراعظم آزاد جموں و کشمیر کا وزیراعظم عمران خان کی آزاد جموں و کشمیر کے عوام کی فلاح و بہبود اور ترقی کے لئے دلچسپی پر اظہار تشکر کیا گیا۔

چیف سیکرٹری آزاد جموں و کشمیر کی اجلاس کو کورونا وائرس کی صورتحال پر بریفنگ دی گئی جبکہ اسپتالوں میں کورونا وائرس متاثرین کے علاج و دیکھ بھال، ڈاکٹروں اور طبی عملے کی استعداد کو بڑھانے کے حوالے سے حکومت پاکستان کی طرف سے بھرپور معاونت پر بھی بریفنگ دی گئی ہے۔

اجلاس میں وائرس کی روک تھام کے لئے عوام میں ایس او پیز پر عملدرآمد ممکن بنانے کے اقدامات،  ہیلتھ کارڈ کی آزاد جموں و کشمیر کے ہر شہری میں تقسیم کو جلد ممکن بنانے سے متعلق بھی گفتگو ہوئی جبکہ لائن آف کنٹرول کے متاثرین کی فلاح و بہبود، ترقیاتی منصوبوں پر پیشرفت اور مستقبل کے منصوبوں پر عملدرآمد کے حوالے سے روڈمیپ پر  تفصیلی بریفنگ دی گئی۔

یاد رہے کہ اجلاس میں علی امین گنڈاپور، سردار مسعود خان، راجہ فاروق حیدر، معاون خصوصی ڈاکٹر ثانیہ نشتر،  آزاد جموں و کشمیر اور کابینہ کے وزراء و سینیئر افسران نے شرکت کی۔