وزیراعظم عمران خان کی جانب سے لاہور میں احساس ایمرجنسی کیش پروگرام کے تحت ضرورت مند افراد میں رقوم کی منتقلی کے لیے قائم شدہ سینٹر کا دورہ کیا گیا ہے۔

دورے کے دوران وزیرِاعظم نے ضرورتمند افراد میں کیش کی منتقلی کے عمل کا جائزہ لیا اور معاون خصوصی برائے سماجی تحفظ ڈاکٹر ثانیہ نشتر نے وزیرِاعظم کو احساس پروگرام کے حوالے سے بریفنگ بھی دی۔

بریفنگ میں وزیرِاعظم کو بتایا گیا کہ وزیرِاعظم کوویڈ فنڈ سے تقریبا تیرہ لاکھ افراد کو مالی معاونت فراہم کی جائے گی۔

وزیرِ اعظم نے سنٹر پر موجود افراد سے بھی بات چیت کی اور ان سے روزگار کے حالات کے بارے میں دریافت کیا۔

اس موقع پر وزیرِاعظم نے کہا ہے کہ موجودہ حالات میں حکومت  تعمیراتی شعبے کے فروغ  پر خصوصی توجہ دے رہی ہے تاکہ  مزدور اور غریب افراد کو روزگار کے مواقع میسر آئیں۔

دوسری جانب وزیراعظم عمران خان کو  وزیرِاعلیٰ سیکرٹیریٹ میں  مقامی حکومتوں کے نظام پر بریفنگ دی گئی۔

وزیراعظم  نے ہدایت کی ہے کہ لوکل باڈیز کے نظام کو جلد از جلد فعال کرنے کے لئے الیکشن کے انعقاد کے انتظامات مکمل کئے جائے تاکہ  مقامی حکومتوں کے ذریعے عوام کے مسائل ان کی دہلیز پرحل کیے جاسکیں ۔

 وزیراعظم کو بتایا گیا کہ تمام انتظامی اور قانونی انتظامات مستعدی سے کیے جارہے ہیں اور ولیج پنچایت الیکشن اور لوکل باڈیز الیکشن مقرره وقت پر منعقد کئے جائے گے۔

اجلاس کو بتایا گیا کہ صوبائی الیکشن کمیشن اگلے ماہ سے ساٹھ دنوں میں حلقہ بندیاں مکمل کر لے گا اور جس کے بعد ولیج اور پنچایت کی سطح پر  الیکشن کروائے جا سکتے ہیں ۔

یہ الیکشن پنتالیس دنوں میں مکمل ہو ں گے، لوکل باڈیز الیکشن کا انعقاد سال کے آخرتک ہو سکتا ہے۔

وزیر اعظم کی جانب سے لوکل باڈیز کے حوالے سے انتظامی اور قانونی تقاضوں کی تیاری کی رفتار پر اطمینان کا اظہار کیا گیا۔

اجلاس  میں وزیر اعلی پنجاب سردار عثمان بزدار اور صوبائی  وزراء اور سینئر افسران شریک ہوئے۔