پیپلز پارٹی کی مرکزی ڈپٹی سیکریٹری اطلاعات پلوشہ خان نے کہا ہے کہ وزیراعظم کورونا کے بارے میں ذہنی طور پر مفلوج ہیں۔

تفصیلات کے مطابق پیپلز پارٹی کی مرکزی ڈپٹی سیکریٹری اطلاعات پلوشہ خان نے کورونا وائرس کے حوالے سے عمران خان کی بریفنگ پر سخت ردعمل کا اظہار کرتے ہوئے کہا ہے کہ وزیراعظم باور کرا رہے ہیں کہ وباء کا مقابلہ قوم خود کرے

پیپلز پارٹی کی مرکزی ڈپٹی سیکریٹری اطلاعات نے کہا کہ عمران خان کے اپنے گورنر اور وزراء ایس او پیز کی دھجیاں اڑا رہے ہیں جبکہ نالاٸق وزیراعظم وباء کی تباہی کا ملبہ عوام پر نہ ڈالیں۔

پلوشہ خان نے یہ بھی کہا کہ عمران خان کی ذہنی پوزیشن یہ نہیں ہے کہ وہ کورونا وباء کے شکار عوام کو صحت کی ضمانت دے سکیں جو ریاست کی ذمے داری ہے ۔

پیپلز پارٹی کی مرکزی ڈپٹی سیکریٹری اطلاعات پلوشہ خان نے مزید کہا کہ 18ویں ترمیم کی آڑ میں وزیراعظم اپنی ذمہ داریوں سے فرار اختیار نہ کریں اور آگر صحت وفاق کی ذمہ داری نہیں تو وزیر اعظم صحت کے انچارج وزیر کیوں ہیں۔

واضح رہے اس سے قبل وزیراعظم عمران خان کی زیرصدارت لاک ڈاؤن سے متعلق فیصلوں کے لیے قومی رابطہ کمیٹی کا اجلاس وزیراعظم ہاؤس  میں ہوا۔

لاک ڈاون میں 30 جون تک توسیع

قومی رابطہ کمیٹی کے اجلاس کے بعد قوم سے خطاب کرتے ہوئے وزیر اعظم عمران خان نے ملک میں ہفتہ اور اتوار کو مکمل لاک ڈاؤن کا اعلان کیا۔

وزیر اعظم نے کہا تھا کہ ابتداء میں 26 کیسز پر ہم نے لاک ڈاؤن کیا تھا۔  لاک ڈاؤن کا مقصد احتیاط اور علاج ہے۔مختلف ممالک میں لاک ڈاؤن کے مختلف اثرات موصول ہورہے ہیں۔

عمران خان نے کہا تھا کہ پاکستان میں زیادہ تر لوگوں کا تعلق غریب طبقے سے ہے  تاہم 18 ویں ترمیم کی وجہ سے لاک ڈاؤن کا فیصلہ صوبوں نے خود کیا۔18 ویں ترمیم کے بعد صوبے بااختیار ہیں۔

وزیراعظم عمران خان نے مزید کہا تھا کہ امیرملکوں نےبھی لاک ڈاؤن کھولنے کا فیصلہ کیا ۔میں عوامی اجتماعات روک دیتا مگرکاروبار اورتعمیراتی شعبےکوکبھی نہیں روکتا۔بدقسمتی سےجیسا لاک ڈاون ہوا،اس کی وجہ سےنچلےطبقےکوبڑی تکلیف ہوئی۔