وزیراعظم عمران خان نے کہا ہے کہ ملک میں اداروں کے ساتھ اصلاحاتی عمل کو مزید تیز کرنے کی ضرورت ہے۔

تفصیلات کے مطابق وزیر اعظم عمران خان کی زیر صدارت  پاکستان انٹرنیشنل ائیرلائنز میں اصلاحات کے حوالے سے اعلیٰ سطحی اجلاس ہوا جس میں وزیراعظم کا کہنا تھا کہ پی آئی اے کو انتظامی اصلاحات  تیز کرنے کے ساتھ موجودہ وسائل کو نہایت شفاف طریقے سے بہترین استعمال یقینی بنانے کی ضرورت ہے۔

 وزیراعظم  کا اصلاحات کے حوالے سے کہنا تھا کہ اس ضمن میں مفصل اور جامع حکمت عملی  کے مطابق ترجیحی بنیادوں پر پیش رفت کی جائے کیونکہ اہم قومی اداروں کو نقصان سے نکالنا اور انہیں فعال و مستحکم ادارے بنانا موجودہ حکومت کے ایجنڈے کا اہم جزوہے۔

اجلاس کے دوران قومی ائیر لائنز کو نقصانات سے بچانے اور منافع بخش ادارہ بنانے کے لئے کی جانے والی اصلاحات میں پیش رفت کا جائزہ لیا گیا جبکہ بریفنگ بھی دی گئی جس میں بتایا گیا کہ پی آئی اے کی موجودہ انتظامیہ کے دور میں ادارے کے نقصانات میں خاطر خواہ کمی واقع ہوئی ہے۔

بریفنگ میں مزید بتایا گیا کہ آپریشنل سطح پر ادارہ بغیر کسی نقصان اٹھائے پروازیں چلانے کی پوزیشن میں آگیا تھا لیکن کورونا کی صورتحال کے بعد یہ کاوشیں متاثر ہوئی ہیں۔

یاد رہے کہ اجلاس میں غلام سرور، سینیٹر شبلی فراز، اسد عمر، میاں محمد سومرو، ڈاکٹر عشرت حسین، عبدالرزاق داؤد، ڈاکٹر عبدالحفیظ شیخ، لیفینٹ جنرل (ر) عاصم سلیم باجوہ، سید ذوالفقار عباس بخاری، عاطف بخاری، سی ای او پی آئی اے ائیر مارشل ارشد ملک و دیگر سینئر افسران بھی شریک ہوئے تھے۔