چیئرمین سینیٹ صادق سنجرانی نے بلوچستان نیشنل پارٹی مینگل کے سربراہ اختر مینگل سے پارلیمنٹ لاجز میں ملاقات کی ، جس میں بی این پی مینگل کے سربراہ نے چیئرمین سینیٹ کو اپنے تحفظات سے  آگاہ کیا۔

ملاقات میں چیئرمین سینیٹ نے پرویزخٹک کی سربراہی میں قائم مذاکراتی کمیٹی کا پیغام سردار اختر مینگل تک  پہنچایا اور مذاکراتی کمیٹی کی طرف سے جلد ملاقات کی اطلاع دی جس پر اختر مینگل نے چیئرمین سینیٹ صادق سنجرانی کو حکومت کی دوبارہ حمایت کرنے کے لیے فوری یقین دہانی سے معذرت کرلی۔

اس موقع پر سردار اختر مینگل نے اپنے موقف دہراتے ہوئے کہا کہ جو کرنا تھا کرلیا اب میرے پاس کرنے کو کچھ نہیں، اب جو کچھ پیشرفت کرنا ہے حکومت کو کرنا ہے۔

چیئرمین سینٹ محمد صادق سنجرانی نے سردار اختر مینگل سے گفتگو کرتے ہوئے کہا کہ آپ کا پیغام مذاکراتی کمیٹی کو پہنچا دوں گا مگر ہمیں آپکو ساتھ لیکر چلنا ہے کیونکہ بلوچستان کے مسائل کے حل کے لئے ہم ملکر زیادہ موثر کوششیں کرسکتے ہیں۔

بی این پی مینگل نے پی ٹی آئی اتحاد سے علیحدگی اختیار کرلی

بعد ازاں ملاقات کے بعد میڈیا سے گفتگو کرتے ہوئے سردار اختر مینگل نے کہا کہ صادق سنجرانی کا تحریک انصاف سے تعلق نہیں،صادق سنجرانی حکومت کے اتحادی اور چیئرمین سینٹ ہیں اسی لئے وہ آئے تھے۔

سردار اختر مینگل نے مزید کہا کہ چیئرمین سینٹ جاننا چاہتے تھےکہ ایسا کیوں ہوا،چیئرمین سینٹ سے کہا ہے جاکر حکومت سے پوچھیں معاہدوں پر عمل کیوں نہیں ہوا،اگر معاہدوں پر کچھ عمل ہوا ہے تو کتنا ہوا ہے حکومت سے پوچھیں۔

واضح رہے اس سے قبل بلوچستان نیشنل پارٹی (مینگل گروپ) نے پاکستان تحریک انصاف (پی ٹی آئی)  حکومت کے ساتھ کیے گئے اتحاد سے علیحدگی اختیار کرنے کا اعلان کیا تھا۔

بی این پی چئیرمین سردار اختر مینگل نے قومی اسمبلی میں اظہار خیال کرتے کہا تھا کہ میں آج ایوان میں پی ٹی آئی اتحاد سے علیحدگی کا اعلان کرتا ہوں، پارٹی نے 2 سال تک تحریک انصاف کے ساتھ معاہدے پرعملدرآمد کا انتظار کیا، مزید بھی کرنے کو تیار ہیں تاہم کچھ شروع تو کیا جائے،ہم ایوان میں موجود رہیں گے اور اپنی بات کرتے رہیں گے۔