وزیراعظم عمران خان اور سری لنکن صدر کے درمیان ٹیلی فونک رابطہ ہوا ہے۔

رابطے کے دوران دونوں رہنماوں کے درمیان دوطرفہ تعلقات اور خطے کے امور پر تبادلہ خیال کیا گیا ہے۔

دوران رابطہ وزیراعظم عمران خان کی سری لنکا کی جانب سے کورونا وائرس سے نمٹنے کے لئے کئے گئے اقدامات کی تعریف کی گئی جبکہ وزیراعظم نے سری لنکن صدر کو حکومت پاکستان کی جانب سے کورونا وائرس کے تدارک کے لئے کئے گئے اقدامات سے بھی آگاہ کیا ہے۔

وزیراعظم و سری لنکن صدر کے درمیان رابطے کے متعلق اعلامیہ بھی جاری کردیا گیا ہے۔

حکومتی جاری اعلامیے کے مطابق وزیر اعظم نے سری لنکن صدر کو ترقی پذیر ممالک کے لئے “قرضہ ریلیف پروگرام” کے بارے میں آگاہ کیا ہے جبکہ ترقی یافتہ اور ترقی پذیر ممالک کی باہمی ترقی کی اہمیت پر بھی زور دیا ہے۔

وزیراعظم نے مقبوضہ کشمیر کی سنگین صورتحال کے بارے میں سری لنکن صدر کو آگاہ کیا ہے اور کشمیر تنازعہ کے پرامن حل کے لئے بھی زور دیا ہے۔

 وزیراعظم عمران خان نے کہا ہے کہ جنوبی ایشیاء میں ڈیڑھ ارب سے زیادہ افراد کی صلاحیتوں سے فائدہ اٹھانے کے لیے محاذ آرائی کے بجائے تعاون کو فروغ ملنا چاہیئے اور سارک کے پلیٹ فارم سمیت علاقائی تعاون کے ذریعے پائیدار ترقی اور خوشحالی کے اہداف کو آگے بڑھانا چاہیئے۔

وزیر اعظم نے سری لنکا کے صدر کو کوڈ 19 کی صورتحال بہتر ہونے کے بعد دورہ پاکستان کی دعوت بھی دی ہے اور کہا ہے کہ پاکستان اور سری لنکا کے تعلقات باہمی اعتماد، احترام اور خودمختاری پر مبنی ہیں۔