وفاقی وزیر اطلاعات شبلی فراز کا کہنا ہے فاٹا کی عوام اور نوجوان وزیراعظم کے دل کے بہت قریب ہیں۔

وزیراعظم کی زیرصدارت وفاقی کابینہ کے اجلاس کےبعد میڈیا کو بریفنگ دیتے ہوئے وزیر اطلاعات شبلی فراز نے کہا کہ  اجلاس میں فاٹا میں ترقیاتی منصوبوں سے متعلق  بات ہوئی۔

وزیر اطلاعات نے کہا کہ  وزیراعظم فاٹا میں ترقیاتی منصوبے جلد مکمل  کرنا چاہتے ہیں۔فاٹا کی عوام اور نوجوان وزیراعظم کے دل کے بہت قریب ہیں۔ وفاقی حکومت نے طے شدہ حصہ فاٹا کو جاری کر دیا ہے۔

شبلی فراز کا کہنا تھا کہ  وزیراعظم نے مشیرخزانہ کی سربراہی میں ایک کمیٹی تشکیل دی ہے۔ کمیٹی باقی صوبوں سے فاٹا کے ترقیاتی کاموں کے بجٹ کے حوالے سے رابطہ کرے گی۔

انہوں نے مزید کہا کہ  فاٹا کی عوام نے ملک کے لیے بہت قربانیاں دی ہیں ۔آئندہ مالی سال میں فاٹا میں تمام ترقیاتی منصوبے شروع ہو جائیں گے۔

چینی اور گندم کے معاملات سے متعلق  وفاقی وزیر اطلاعات کا کہنا تھا کہ چینی سے متعلق عمل کو شفاف بنانا ضروری ہے۔ گندم کی اسمگلنگ روکنے کے لیے  بھی اقدامات کر رہے ہیں۔

شبلی فراز نے کہا کہ   آٹے کی قیمت کنٹرول کرنے کے لیے پنجاب کو نو لاکھ ٹن گندم ریلیز کرنے کا کہا گیا ہے۔

کورونا کے حوالے سے ان کا کہنا تھا کہ اجلاس میں کرونا کے حوالے سے تفصیلی بات چیت ہوئی ہے۔  کورونا کے بعد پتا چلا کہ ملک میں صحت کا نظام کتنا خراب ہے۔

وفاقی وزیر اطلاعات نے کہا کہ  ملک میں ہر روز پچاس ہزار ٹیسٹ کرنے کی  سہولت موجود ہے۔ ملک بھر میں کورونا ٹیسٹنگ کی لیب 129 ہوگئی ہیں ۔

شبلی فراز کا کہنا تھا کہ  جب تک کورونا کی ویکسین نہیں آ جاتی اس طرح کی صورتحال کا سامنا رہے گا۔پاکستان میں کورونا کی وجہ سے ہلاکتیں کم ہیں،  وبا ءپر بہت جلد قابو پا لے گے۔