اپوزیشن لیڈر سندھ اسمبلی فردوس شمیم نقوی نے کہا ہے کہ وزیراعظم عمران خان کو اللہ نے سلیکٹ کیا ہے۔

تفصیلات کے مطابق اپوزیشن لیڈرفردوس شمیم نقوی نے اسمبلی میں تقریر کرتے ہوئےپیپلز پارٹی کو تنقیدی لہجے میں کہا ہے کہ  کہتے رہیں کہ حکومت الیکٹڈ نہیں سلیکٹڈ ہے مگر میں کہتا ہوں کہ عمران خان کو اللہ نے سلیکٹ کیا ہے۔

فردوس شمیم نقوی نے پاکستان پیپلز پارٹی کو سندھ اسمبلی میں تنقید کا نشانہ بناتے ہوئے کہا ہے کہ پاکستان میں پیپلز پارٹی کے دور سے پہلے کی بیلنس شیٹ پڑھیں ،اگر پیپلز پارٹی نے منافع بڑھایا ہے تو وزیر اعلیٰ سندھ سچے ہیں لیکن اگر کم ہوا ہوگا تو میں سچا ثابت ہوگا۔

 انہوں نے کہا ہے کہ جب تک ملک میں باہر کے بھکاری رہیں گے قرضے رہیں گے اور حکومت کی جانب سے بیرونی قرضوں پر لعنت ہے۔

سندھ اسمبلی میں خطاب کے دوران انہوں نے بتایا کہ وہ شخص جو کہتا تھا کہ میں کشکول کسی کے سامنے لے کر نہیں جاؤں گا اس نے ملک بچانے کی خاطر اپنا اصول توڑ دیا  اور 2018 میں ملک کو ڈیفالٹ ہونے سے بچایا۔

ان کا کہنا تھا کہ آرمی چیف نے بھی قرض لینے میں حکومت کی مدد کی اور ہم ان کو بھی خراج تحسین پیش کرتے ہیں۔

فردوس شمیم نقوی کا کہنا تھا کہ عمران خان کو آسان کام پسند نہیں ہیں وہ بنیں ہی مشکل کاموں کے لئے ہیں۔

انہوں نے بتایا کہ عمران خان کی حکومت میں ٹیکسٹائل کی گروتھ 77 فیصد ہے۔

اپوزیشن لیڈر نے پی پی پی حکومت کو کہا ہے کہ آپ نے فیصلے بہت اچھے کئے لیکن ان کا زمین پر کچھ بھی اثر نہیں ہوا، آپ نے لاک ڈاؤن لگایا اچھی بات ہے لیکن اس پر عمل نہیں ہوا۔

انہوں نے کہا کہ یوم علی کا جلوس ضرور نکلنا چاہیے تھا لیکن جس طرح نکلا وہ درست نہیں تھا۔

فردوس صاحب نے کہا کہ پاکستان، پاکستان ہے اور اس کے ہر خطہ کا قانون الگ نہیں ہے اور ہم اٹھارویں ترمیم کے خلاف نہیں ہیں۔

انہوں نے واضح کیا کہ بھٹو مسٹر برائٹ بھی تھا اور رائٹ بھی تھا لیکن پھر کیا وہ غلط تھے جنہوں نے آئین میں گورنر راج رکھا؟ کیا گورنر راج کا مطالبہ غیر آئینی ہے؟ اور اگر میں غلط ہوں تو میری ممبر شپ کینسل کردیں ۔