وزیراعظم عمران خان اور چوہدری برادران نے پارٹی ارکان اور اتحادی جماعتوں کے رہنماؤں کے لئے ایک ہی روز عشائیے رکھ لیے۔

تفصیلات کے مطابق وزیراعظم عمران خان نے آج حکومتی و اتحادی ارکان قومی اسمبلی کے اعزاز میں پارٹی ارکان اور اتحادی جماعتوں کے رہنماؤں کو عشائیے پر مدعو کیا ہے جو وزیراعظم ہاؤس میں دیا جائے گا۔

ذرائع کا کہنا ہے کہ حکومت کی اتحادی جماعت مسلم لیگ (ق) نے وزیراعظم عمران خان  کی جانب سے دیے گئے عشائیے میں شرکت نہ کرنے کا فیصلہ کیا ہے۔

اس حوالے سے ترجمان مسلم لیگ ق کا کہنا ہے کہ حکومت کے اتحادی ہیں مگرعشائیہ میں شریک نہیں ہو رہے کیونکہ پارٹی رہنما مصروف ہیں لیکن بجٹ کی منظوری کے تمام عمل میں حکومت کو ووٹ دے رہے ہیں۔

ذرائع کا کہنا ہے کہ عشائیے میں وزیراعظم بجٹ منظوری کے لیے ارکان کو اعتماد میں لیں گے جبکہ اتحادیوں کے تحفظات بھی سنیں گے اور اتحادیوں کو تحفظات دور کرنے کی یقین دہانی کروائیں گے۔

دوسری جانب مسلم لیگ (ق) کے چوہدری برادران نے بھی آج ہی اتحادی جماعتوں سمیت آزاد ارکان اسمبلی کو عشائیے کی دعوت دے رکھی ہے۔

ذرائع کا کہنا ہے کہ چوہدری برادران نے اتحادی رہنماؤں کو وزیراعظم کے عشائیے سے قبل ہی دعوت دے رکھی ہے اور  اتحادی جماعتوں کے کئی رہنما چوہدری شجاعت حسین اور چوہدری پرویز الٰہی کو عشائیے میں شرکت کی یقین دہانی کراچکے ہیں۔

چوہدری برادران کی جانب سے حکومتی اتحادی جماعتوں متحدہ قومی موومنٹ (ایم کیو ایم)، بلوچستان عوام پارٹی(بی اے پی) اور گرینڈ ڈیموکریٹک الائنس (جی ڈی اے) سمیت آزاد ارکان کو دعوت دی ہے تاہم عشائیے میں تحریک انصاف کے رہنماؤں کو مدعو نہیں کیا گیا۔