وفاقی وزیر مواصلات مراد سعید نے کہا ہے کہ پاکستان پیپلز پارٹی نے قومی اداروں کو لوٹ کر پیسہ جعلی اکاؤنٹس میں چھپایا ہے۔

تفصیلات کے مطابق پاکستان پیپلز پارٹی کے چیئرمین بلاول زرداری کے بیان پر تحریک انصاف کے رکن اور وفاقی وزیر موصلات مراد سعید نے ردعمل ظاہر کیا ہے۔

مراد سعید نے کہا ہے کہ مشکوک اور بدعنوانی کر کے ایئرلائن میں لوگ بھرتی کرنے اور پی آئی کو تباہی کے کنارے لاکھڑا کرنا فرزند زرداری کی جماعت کا کارنامہ ہے کیونکہ انہوں نے قومی اداروں کو لوٹ کر پیسہ جعلی اکاؤنٹس میں چھپایا ہے۔

انہوں نے کہا ہے کہ ان لوٹے ہوئے پیسوں اور ان جعلی اکاؤنٹس سے فرزند زرداری صدقے کے بکرے دیئے گئے، انہی جعلی اکاؤنٹس سے زراداری صاحب کی اولاد کی سالگرہ کی ضیافتیں بھی اڑائی گئیں۔

پاکستان ہماری ماں ہے اور اس کے ادارے دھرتی ماں کے زیورات ہیں، بلاول بھٹو زرداری

انہوں نے کہا کہ فرزند زرداری بھاشن دینے کے نہیں قوم کو لوٹ مار کی وضاحت پیش کرنے کے پابند ہیں اور اگر آپ اپنے خیالات میں مخلص ہیں تو قوم سے معافی مانگ کر چوری شدہ دولت خزانے میں واپس کریں۔

وفاقی وزیر نے بتایا ہے کہ فرزند زرداری ملک کو ماں اور اداروں کو اسکا زیو ر سمجھتے ہیں تو ضرور پاکستان اور اسکے اداروں سے معافی مانگیں گے کیونکہ والد اور انکی جماعت نے پاکستان کو کنگال اور اسکے اداروں کو برباد کیا ہے۔

انہوں نے واضح کیا ہے کہ اسٹیل ملز، پی آئی اے، پاکستان ریلویز سمیت تمام اداروں کی تباہی کی بنیاد پیپلز پارٹی نے رکھی ہے کیونکہ 2008 تک اسٹیل ملز کا 8 ارب سے زائد منافع تھا پھر آپ کے ابو زرداری آئے اور والد کی سربراہی میں پیپلز پارٹی کے ہاتھ اسٹیل ملز لگی تو زوال اور تباہی کی آخری حدوں کو پہنچ گئی اور صرف اتنا ہی نہیں بلکہ ریلویز کی تباہی کا سہرا بھی پیپلز پارٹی کے سرجاتا ہے۔