پی پی پی چیئرمین بلاول بھٹو زرداری نے کہا ہے کہ پیپلز پارٹی حقِ خودارادیت ملنے تک کشمیریوں کی ہرفورم پر اخلاقی، سیاسی اور سفارتی حمایت جاری رکھے گی۔

تفصیلات کے مطابق چیئرمین پیپلز پارٹی بلاول بھٹو زرداری نے یومِ الحاقِ پاکستان کے موقع پر مظلوم کشمیریوں کے نام پیغام میں کہا کہ جس جوش و جذبے کے ساتھ یومِ الحاقِ پاکستان منایا جا رہا ہے، واضح کرتا ہے کہ بھارتی تسلط بہت جلد ختم ہونے کو ہے۔

اپنے بیان میں پی پی پی چیئرمین بلاول بھٹو زرداری نے کہا کہ کشمیریوں کی جدوجہد کودبانےکے لیےبھارت نے وحشیانہ مظالم کےریکارڈتوڑدیئے۔

بلاول بھٹو زرداری نے یہ بھی کہا کہ بربادی اورذلت بھارت کا مقدرہے کیونکہ بھارتی بربریت مقبوضہ کشمیرکےعوام کےعزم کومزید مضبوط بنائےگی۔

پی پی پی چیئرمین بلاول بھٹو زرداری نے مزید کہا کہ عالمی برادری اپنے فرض سے غافل ہے، مسئلہ کشمیر کا حل اقوامِ متحدہ کی قراردادوں  کے مطابق کرایا جائے۔

واضح رہے کہ دنیا بھر میں کشمیری آج یوم الحاق پاکستان منا رہے ہیں،اس دن کو منانے کا مقصد اس عہد کی تجدید کرنا ہے کہ کشمیر پاکستان کا حصہ ہے اور اسکے پاکستان سے الحاق تک جدوجہد جاری رہے گی۔

کشمیری آج یوم الحاق پاکستان منا رہے ہیں

انیس جولائی 1947 کو کشمیریوں نے نظریاتی طور پر پاکستان سے رشتہ جوڑ کر الحاق کا فیصلہ کیا، آل جموں وکشمیر مسلم کانفرنس کے اجلاس کے دوران کشمیر کے پاکستان کے ساتھ الحاق کی قرارداد متفقہ طورپر منظور کی گئی۔

کشمیری اس دن اس عہد کی تجدید کرتے ہیں کہ پاکستان کے ساتھ الحاق تک تحریک جاری رکھی جائے گی۔

جذبہ آزادی سے سرشار کشمیریوں کا آج بھی یہی نعرہ ہے کہ کشمیر بنے گا پاکستان۔