وزیراعظم عمران خان نے کہا ہے کہ میگا پراجیکٹس اور لانگ ٹرم منصوبہ بندی ہی پاکستان کا مستقبل ہے۔

تفصیلات کے مطابق وزیراعظم عمران خان نے مشیر پارلیمانی امور ڈاکٹر بابر اعوان کو ٹیلی فون کیا جس میں اہم ملکی و قومی امور سمیت سیاسی معاملات پر تبادلہ خیال کیا گیا۔

اس موقع پر بابر اعوان نے ملک کے سب سے بڑے ہائیڈرو پاور منصوبے پر کام کے عملی آغاز پر وزیراعظم کو مبارکباد دی۔

ملاقات میں مشیر پارلیمانی امور ڈاکٹر بابر اعوان نے کہا کہ بدقسمتی سے ماضی میں حکمرانوں نے ایسے لانگ ٹرم منصوبوں پر توجہ نہیں دی، اسلام آباد میں نیو بلیو ایریا منصوبے میں ریکارڈ سرمایہ کاری کی توقع ہے۔

عمران خان نے کہا کہ 40 سال پہلے ایسے منصوبے بننا شروع ہوجاتے تو آج پاکستان ترقی یافتہ ملک ہوتا، یہ منصوبہ پاکستان کی تقدیر بدلے گا۔

وزیراعظم عمران خان نے مزید کہا کہ معیشت کی بہتری کا سفر پھر سے شروع ہو رہا ہے، معیشت کی بہتری پر پوری توجہ ہے,جلد نمایاں بہتری دیکھنے میں آئے گی۔

دیامر بھاشا ڈیم ملک کا تیسرا بڑا ڈیم ہوگا ، وزیراعظم

واضح رہے اس سے قبل وزیراعظم عمران خان چلاس میں دیامر بھاشا ڈیم کے سائٹ وزٹ پر پہنچے جہاں انہوں نے عوامی اجتماع سے خطاب کیا تھا۔

وزیراعظم نے کہا تھا کہ وہی قوم ترقی کرتی ہے جو مستقبل کو مدنظر رکھتے ہوئے منصوبے بناتی ہے۔

وزیراعظم نے کہا تھا کہ ماضی میں حکومتوں نے غلط فیصلے کیے جس کے باعث ہم ترقی میں دیگر ممالک سے پیچھے رہ گئے، 90 کی دہائی میں کیے گئے فیصلوں سے ملک کو نقصان ہوا اور معیشت کمزور ہوئی۔

اس موقع پر آرمی چیف جنرل قمر جاوید باجوہ، ڈی جی آئی ایس آئی لیفٹیننٹ جنرل فیض حمید اور چیئرمین سی پیک اتھارٹی عاصم باجوہ بھی موجود تھے۔