وزیراعظم عمران خان کی جانب سے بنائی گئی ٹائیگر فورس کوعالمی سطح پر پذیرائی حاصل ہو گئی ہے۔

تفصیلات کے مطابق چین  وزیراعظم کی جانب سے تیار کی گئی ٹائیگرز فورس کا معترف ہوگیا، ٹائیگرفورس قائم کرنے کے اقدام کی تعریف کی اور پاکستان سے ٹائیگرز فورس سے متعلق معلومات اور تجربے پر تبادلہ خیال کرنے کی بھی اپیل کردی۔

ذرائع کے مطابق آل چائنا یوتھ فیڈریشن کے عہدے داران نے پاکستانی حکام کو ایک خط بھیجا ہے جس میں رضاکاروں پر مشتمل ٹائیگرز فورس پر آپریشنل تفصیلات فراہم کرنے کی درخواست کی ہے۔

خط میں لکھا گیا کہ عثمان ڈار کی سربراہی میں عالمی وبا کو رونا  سے نمٹنے کے لیے نوجوانوں پر مشتمل ٹائیگر فورس بنائی گئی، پاکستان میں اس فورس کے اقدامات کو عوام اور سیاسی رہنماؤں کی جانب سے سراہا جا رہا ہے، چائینز یوتھ بھی پاکستان کی ٹائیگرز فورس کے تجربے سے سیکھنے کی خواہش مند ہے۔

خط میں مزید لکھا گیا کہ چین کو بھی کورونا وبا کے باعث معاشی اور سماجی چیلنجز کا سامنا ہے، اس لیے چین وبائی چیلنجز سے نمٹنے کے لیے ٹائیگرز فورس کے تجربات سے سیکھنا چاہتا ہے، پاکستان ٹائیگرز فورس سے متعلق ضروری معلومات فراہم کرے تو شکر گزار ہوں گے۔

واضح رہے کہ چین ٹائیگرز فورس کے مثبت اقدام کی اپنے الیکٹرانک اور سوشل میڈیا پر تشہیر کے لیے تیار ہے۔