وزیراعظم سے وزیراعلیٰ پنجاب سے ون آن ون ملاقات ہوئی ہے، ملاقات کے دوران وزیراعظم نے وزیراعلیٰ پنجاب عثمان بزدار کی کارکردگی پر اظہار اطمینان ظاہر کیا۔

ملاقات میں وزیراعظم نے ہدایت کی ہے کہ وزیراعلیٰ کو پورے اعتماد کے ساتھ کھل کر کام کریں اور عوام کی فلاح و بہبود کے لئے پنجاب حکومت اپنے تمام وسائل بروئے کار لائے۔

وزیراعظم نے کہا کہ  جس طرح کورونا کے خلاف پنجاب حکومت نے بہترین کام کیا اور اب ہم اسمشکل وقت سے نکل آئے ہیں۔

ملاقات میں پنجاب کے ترقیاتی کاموں کے حوالے سے بھی تبادلہ خیال کیا گیا جبکہ وزیراعظم کو وزیراعلی پنجاب نے جاری منصوبوں سے آگاہ بھی کیا۔

وزیراعلیٰ کی جانب سے کورونا صورتحال اور سمارٹ لاک ڈاون کے حوالے سے اٹھائے جانے والے اقدامات سے بھی وزیراعظم کو آگاہ کیا گیا جبکہ بزنس تھیم پارک اور مون سون شجر کاری مہم پر بھی بریفنگ دی گئی۔

دوسری جانب وزیراعظم عمران خان سے جنوبی  پنجاب سے تعلق رکھنے والے ممبران پارلیمان کے وفد کی لاہور میں ملاقات ہوئی ہے۔

دفد نے جنوبی پنجاب کے علیحدہ صوبے سے متعلق عوامی مطالبے پر موجود حکومت کی جانب سے عملی پیش رفت پر وزیرِ اعظم کا شکریہ ادا کرتے ہوئے کہا کہ جنوبی پنجاب کی عوام کا دیرینہ  مسئلہ  کئی دہائیوں سے تعطل کا شکار تھاجس کے حل کا وعدہ ماضی کی حکومتوں نے کیا مگر  پورا نہیں کیا گیا۔ اس مطالبے کو پاکستان تحریک انصاف نے نہ صرف اپنے منشور کا حصہ بنایا بلکہ   اس کی جانب عملی پیش رفت کی ہے جس پر وہ وزیرِ اعظم کے شکر گزار ہیں۔

وزیراعظم عمران خان نے ممبران سے گفتگو کرتے ہوئے کہا کہ جنوبی پنجاب  سیکریٹریٹ کے قیام سے انتظامی اختیارات کی منتقلی کی جانب  ایک بڑا قدم  اٹھایا گیا ہے۔ جنوبی پنجاب صوبے کے قیام کے حوالے سے بھر پور تیاری اور  آئینی تقاضے پورے کریں گے۔

وزیر اعظم عمران خان نے جنوبی پنجاب صوبے کے قیام کے حوالے سے متعلقہ  معاملات اور تقاضوں کو پورا کرنے کے حوالے سے ایک کمیٹی کی تشکیل کی ہدایت کی جس میں وفاق اور صوبوں سے ممبران شامل ہوں۔

ممبران نے کورونا وائرس  کی روک تھام ،مشکل صورتحال میں عوام کو ریلیف فراہم کرنے، معاشی عمل اور روزمرہ کی سرگرمیوں میں توازن رکھنے کے حوالے سے وزیرِ اعظم عمران خان کے وژن اور حکومتی اقدامات کو سراہتے ہوئے کامیاب حکمت عملی پر وزیرِ اعظم کو خراجِ تحسین پیش کیا۔