وزیراعظم عمران خان نے کہا ہے کہ گوادر بندرگاہ کی تزویراتی اہمیت کے پیش نظر یہ بندرگاہ مستقبل میں ترقی اور خوشحالی کی ضامن ہوگی۔

تفصیلات کے مطابق وزیراعظم عمران خان کی ذیر صدارت وزارت بحری امور کے حوالے سے جائزہ اجلاس ہوا جس میں علی زیدی کی وزارت کی گذشتہ 22 ماہ کی کارکردگی کے حوالے سے مختلف اقدامات پر تفصیلی بریفنگ دی گئی۔

اجلاس میں شاہ محمود قریشی،  سینیٹر شبلی فراز،  مراد سعید، محمد حماد اظہر ،علی زیدی، عبدالحفیظ شیخ، عبدالرزاق داؤد ، عاصم سلیم باجوہ ، ڈاکٹر شہباز گل، چیئرمین سرمایہ کاری بورڈ عاطف بخاری اور سینیئر افسران شریک ہوئے۔

اجلاس کو “بلیو اکانومی” کے مجوزہ روڈمیپ پر عملدرآمد کے حوالے سے بریفنگ میں بتایا گیا کہ ملک میں اس شعبے کی بے پناہ صلاحیت کے باوجود ماضی میں اس شعبے کو نظرانداز کیا گیا۔

علی زیدی نے کہا کہ ورثے میں ملنے والے مسائل اور مشکلات کے باوجود کئی نئے اقدامات اٹھائے گئے۔

علی زیدی نے مزید کہا کہ بلیو اکانومی کے اس شعبے کی ترقی کے لئے روڈمیپ وضع کر رہی ہے جبکہ بلیو اکانومی پر عملدرآمد کی بدولت سرمایہ کاری روزگار ، سیاحت، قابل تجدید توانائی کے بھی بھرپور مواقع پیدا ہوں گے۔

وزیراعظم نے گوادر بندرگاہ سے جڑے ہوئے منصوبوں کی جلد از جلد تکمیل یقینی بنانے اور وزارت بحری امور میں سرمایہ کاری اور ترقی کی بے پناہ صلاحیت کی بدولت ان منصوبوں کو ترجیح دینے کی ہدایت دی۔

وزیراعظم نے کہا کہ گوادر بندرگاہ کی تزویراتی اہمیت کے پیش نظر یہ بندرگاہ مستقبل میں ترقی اور خوشحالی کی ضامن ہوگی۔

عمران خان نے یہ بھی کہا کہ وزارت کے تحت جاری اور مستقبل کے منصوبوں پر جلد عملدرآمد ممکن بنانے کے لیے بین الوزارتی رابطے اور تمام اسٹیک ہولڈرز سے مستقل مشاورت کو یقینی بنایا جائے۔

وزیراعظم عمران خان نے مزید کہا کہ ان منصوبوں کی تکمیل کے حوالے سے موثر ترجیحات مرتب کرنے کے ساتھ ساتھ ان کی ٹائم لائنز بھی متعین کی جائیں۔