پاکستان مسلم لیگ (ن) کے صدر اور قائد حزب اختلاف شہباز شریف  نے وزیراعظم عمران خان سے استعفیٰ دینے کا مطالبہ کرتے ہوئے کہا ہے کہ ڈی جی سول ایوی ایشن کے خط کے بعد وزیراعظم اور وزیر کے خلاف کارروائی ہونی چاہیئے۔

مسلم لیگ ن کے صدر شہباز شریف نے کہا ہے کہ عالمی سطح پر ملک کی بدنامی، قومی ادارے کو اربوں کا نقصان پہنچانے پر وزیراعظم مستعفی ہوں ۔

انہوں نے کہا کہ ڈی جی سول ایوی ایشن کے خط کے بعد وزیراعظم اور وزیروں کے خلاف بھی کارروائی ہونی چاہیئے کیونکہ ملک کے اربوں روپے کے نقصان کا ذمہ دار وزیراعظم ہے جس نے سرکاری خزانے کو نقصان پہنچایا ہے۔

شہباز شریف نے کہا ہے کہ یہ ہوتا ہے اختیارات کا ناجائز استعمال، یہ ہوتی ہے کرپشن سی۔اے۔اے کے سربراہ کے خط نے وزیراعظم، کابینہ اور متعلقہ وزیر کو جھوٹا ثابت کردیا ہے اور دنیا سوال پوچھے گی کہ جس رپورٹ کی بنیاد پر یہ دعوی کیا گیا، اس کی ساکھ کیا ہے؟

ان کا کہنا تھا کہ وزیراعظم اور ان کے وزیر کی حماقت سے پی آئی اے کو پہنچنے والے مالی نقصانات کا ازالہ کون کرے گا؟ بیرون ملک مقیم پاکستانیوں کے روزگار اور ان کی ساکھ کو نقصان پہنچا، اس کا ذمہ دار کون ہے؟ ازالہ کون کرے گا؟ پاکستان کی دنیا بھر میں بدنامی ہوئی، اس کی بھی تو کسی کو سزا ملنی چاہئے؟ پائلٹ نہیں یہ حکومت ، وزیراعظم اور وزیر جعلی ہیں۔

قائد حزب اختلاف کا کہنا تھا کہ معیشت کریش کرنے والوں نے پی آئی اے اور اس کی ساکھ بھی کریش کردی ہے۔

ان کا کہنا تھا کہ ملک کا نام بدنام کرنے والے جعلی حکمرانوں نے قوم کا سکون چھینا ہے اس لئے یہ جعلساز حکمران سزا کے مستحق ہیں۔