وزیراعظم عمران خان کی جانب سے تربت میں دھماکے کی شدید مذمت کی گئی ہے۔

وزیراعظم عمران خان نے دھماکے کے نتیجے میں ہونے والے قیمتی جانی نقصان پر افسوس کا اظہار بھی کیا ہے اور ہدایت کی ہے کہ دھماکے میں زخمی ہونے والے افراد کو بہترین طبی امداد فراہم کی جائے۔

وزیراعظم کی جانب سے زخمیوں کے لئے جلد صحتیابی کے لئے دعا بھی کی گئی ہے۔

دوسری جانب وزیراعلیٰ بلوچستان جام کمال خان نے بھی تربت میں ہونے والے دھماکے کی شدید مذمت کرتے ہوئے کہا ہے کہ بلوچستان کے محب الوطن عوام کی مدد سے سیکیورٹی فورسز دہشتگردوں کو کیفر کردار تک پہنچانے کے لئے پرعزم اور متحرک ہیں۔

اس حوالے سے جام کمال کا کہنا تھا کہ صوبے میں بدامنی پھیلانے کی ہر کوشش کو ناکام بنائیں گے۔

کوئٹہ، تربت بازار میں دھماکا، ایک شخص جاں بحق، متعدد زخمی

یاد رہے کہ اس سے قبل کوئٹہ کے تربت بازار میں گاڑی کے قریب دھماکے کے نتیجے میں ایک شخص جاں بحق جبکہ  8 افراد زخمی ہوگئے۔

پولیس کے مطابق دھماکے نتیجے میں گاڑی میں آگ بھڑک اٹھی جبکہ قریبی عمارتوں اور دکانوں کے شیشے ٹوٹ گئے۔

پولیس ذرائع کا کہناہے کہ دھماکے کی نوعیت معلوم کی جارہی ہے، ابتدائی اطلاعات کے مطابق دھماکا پلانٹڈ لگ رہا ہے۔

اس موقع پر ریسکیو اہلکاروں نے پہنچ کر امدادی سرگرمیوں کا آغاز کردیا ہے ،زخمیوں کوطبی امداد کی فراہمی کیلئے قریبی اسپتال منتقل کردیا گیا۔