وزیراعظم عمران خان نے کہوٹہ میں مون سون شجر کاری مہم کا آغاز کر دیا ہے۔

وزیراعظم نے  پودا لگا کر شجرکاری مہم کا آغاز کیا، مشیر برائے ماحولیاتی تبدیلی ملک امین اسلم وزیراعظم کے ہمرا ہ موجود تھے جبکہ ماحولیات کی وزیرمملکت زرتاج گل بھی   تقریب میں شریک رہے۔

اس موقع پر وزیراعظم عمران خان کا کہنا تھا کہ نوجوان اور طلباء پاکستان کا مستقبل ہیں، طلبا ءاور نوجوانوں کو ماسک پہنے دیکھ کر خوشی ہوئی کہ ایس او پیز پر عمل کر رہے ہیں۔

وزیراعظم نے کہا کہ پاکستان میں کورونا وبا سے بہت کم نقصان ہوا جو اللہ تعالیٰ کا فضل ہے جبکہ دنیا بھر میں کورونا وبا نے تباہی مچائی ہوئی ہے۔

ان مزید کہنا تھا کہ ہمیں عیدالضحیٰ پر بھی احتیاطی تدابیراور قواعد و ضوابط پر لازمی عمل کرنا ہے۔

وزیراعظم نے افسوس کے ساتھ کہا کہ بدقسمتی سے ہمارے ملک میں جنگلات کی قدر نہیں کی گئی اور پاکستان میں وقت کے ساتھ جنگلات کے رقبے میں اضافے کے بجائے تیزی سے کمی ہوئی ہے لیکن موجودہ حکومت نے ملک بھر میں 9 نیشنل پارکس قائم کیے ہیں۔

انہوں نے بتایا کہ 1947 سے لے کراب تک ملک بھر میں صرف 30 نیشنل پارکس تھے، دو سال میں ملک بھرمیں 30 کروڑ پودے لگائے گئےہیں لیکن ہماراہدف ملک بھر میں 10 ارب پودے لگانا ہے۔

انہوں نے کہا کہ نوجوان نسل نہ صرف پودے لگائے بلکہ درختوں کو بھی بچائیں، وزیراعظم نے واضح کیا کہ جنگلات کی حفاظت کیلئے”نگہبان”تعینات کررہے ہیں۔

وزیراعظم عمران خان کا کہنا تھا کہ ہماری نوجوان نسل میں قدرتی ماحول کے تحفظ کے حوالے سے زیادہ شعور ہے اس لئے اسکولوں میں بچوں کو صاف اور سرسبز پاکستان کے حوالے سے مزید معلومات دیں گے اور اس ضمن میں تمام صوبائی چیف سیکریٹریز کو ہدایت بھی کی ہے کہ تمام بڑے شہروں کے ماسٹر پلان بنائے جائیں۔

وزیراعظم کا کہنا تھا کہ شہر پھیلتے جارہے ہیں اور سرسبز و زرعی رقبہ کم ہوتا جا رہا ہے، ہمیں شہروں کے بے ہنگم پھیلاؤ کو روکنا ہوگا کیونکہ پاکستان اللہ تعالیٰ کی نعمت ہے، ہمیں اس  خطے کی قدر کرنی چاہیے۔