وفاقی وزیر برائے مواصلات مراد سعید نے کہا ہے کہ پرچی چیئرمین خوب رٹہ لگاؤ، پرچی بھی بناؤ کیونکہ میں مناظرے کیلئے تیار ہوں۔

تفصیلات کے مطابق وفاقی وزیر برائے مواصلات مراد سعید نے بلاول زرداری کے بیان کا جواب دیتے ہوئے کہا ہے کہ پی ٹی آئی جانب سے وہ مناظرے کے لئے تیار ہیں۔

وفاقی وزیر کا کہنا تھا کہ پارلیمنٹ، میڈیا یا عوامی فورم جس کا چاہو انتخاب کرو، یہ فیصلہ بھی آپکا ہوا کیونکہ ایوان میں تو بحث کی بجائے فرزند زرداری نو دو گیارہ ہو جاتے ہیں۔

مراد سعید نے کہا کہ فرزند زرداری اپنی تین نسلوں کے خیبر پختونخواہ میں تحریک انصاف کے سات سال سے موازنہ  سے بھی بھاگ گئے، ظاہر ہے گفتگو کی ہمت وہ کرسکتا ہے جس کے گناہوں کی کہانیوں سے جے آئی ٹیز نہ بھری ہوں۔

انہوں نے کہا کہ مناظرہ قبول کرنے کی جرات وہ کرے گا جس نے عزیر بلوچ اور گینگ وارز کرنے والے نہ پالے ہوں، سامنے آنے کی جرات وہ کرے گا جس کا دامن جعلی کھاتوں، اومنی گروپوں اور ٹی ٹیوں سے آلودہ نہ ہو اور جس کا صوبہ گورننس میں بہتر ہو۔

ان کا مزید کہنا تھا کہ بات کرنے کی طاقت اس میں ہوگی جس نے پرچی کی بجائے جمہوری جدوجہد کے ذریعے اپنا مقام بنایا ہو۔