پاکستان اسٹاک ایکسچینج حملے میں ارض پاک کو میلی آنکھ سے دیکھنے والے دہشت گردوں کو توڑجواب دینے والے شیر دل اہلکارنے  کہا کہ دہشت گرد نے مجھے زندہ پاکر رائفل اٹھائی تو میں نے سر پر گولی ماری ۔

تفصیلات کے مطابق پاکستان اسٹاک ایکسچینج پر چاروں دہشت گردوں کو مارنے والے  بہادر اہلکار وں کے اعزاز میں کراچی میں تقریب کا انعقاد کیا گیا ۔

اس موقع پر ریپڈ رسپانس فورس (آر آر ایف )کے بہادر اہلکار رفیق سومرو نے کہا کہ دہشت گرد ایک ایک کرکے فائرنگ کررہے تھے اور ساتھ ہی دستی بم بھی پھینک رہے تھے۔

بہادر اہلکار رفیق سومرو نے یہ بھی کہا کہ ہمارے چند ساتھی شہید ہوئے تو دہشت گرد نے مجھے زندہ پاکر مارنے کے لیے رائفل اٹھائی ہی تھی کہ میں نے فوری اس کے سر پر گولی ماری۔

ریپڈ رسپانس فورس (آر آر ایف )کے بہادر اہلکار رفیق سومرو نے مزید کہا کہ چاروں دہشت گرد اسٹاک ایکسچینج کے اندر داخل ہونا چاہتے تھے لیکن ہم نے انہیں آگے بڑھنے نہیں دیا اور مرکزی گیٹ پر ہی مار گرایا۔

اہلکار خلیل جتوئی نے کہا کہ اچانک فائرنگ ہوئی تو میں نے گیٹ کی طرف دیکھا وہاں کچھ زخمی تھے دہشت گرد نے فائرنگ کی تو میں نے چھت سے اس کو ہٹ کیا۔

واضح رہے کہ کچھ روز قبل کراچی میں واقع پاکستان اسٹاک ایکسچینج کی عمارت پہ چار مسلح دہشتگردوں نے حملہ کیا تھا، فورسز کی جوابی کارروائی میں چاروں دہشتگرد مارے گئے تھے۔

پولیس کے مطابق صبح 10 بجے کے قریب 4 دہشتگردوں نے اسٹاک ایکسچینج کے گیٹ پر پہلے دستی بم حملہ کیا اور پھر اندھا دھند فائرنگ  شروع کردی تھی ۔

پاکستان اسٹاک ایکسچینج پر دہشتگردوں کا حملہ ناکام ، 4 دہشتگرد ہلاک

ڈی جی رینجرز سندھ میجر جنرل عمر بخاری نے پریس کانفرنس میں بتایا کہ اسٹاک ایکسینج پر حملہ کرنے والے دہشتگردوں  کو آٹھ منٹ کی کارروائی میں ہلاک کردیا گیا۔

ڈی جی رینجرز سندھ نے بتایا کہ  صبح 10 بجکر 2 منٹ پر گاڑی میں سوار دہشت گرد پہنچے تھے جبکہ  واقعے کا اختتام 10 بجکر 10 منٹ پر ہوگیا تھا۔

میجر جنرل عمر بخاری نے کہا کہ  آٹھ منٹ میں دہشت گردوں کا مقابلہ کرکے انہیں مار دیا گیا۔ دہشت گردوں کو احداف حاصل نہیں کرنے دیے گئے۔