سپریم کورٹ کی جانب سے کراچی میں تجاوزات کے خاتمے سے متعلق رپورٹ طلب کرلی گئی ہے۔

تفصیلات کے مطابق سپریم کورٹ کی جانب سے طلب کردہ تجاوزات کی رپورٹ کے حوالے سے دس اگست سے اہم مقدمات کی سماعت ہوگی کیونکہ عدالت نے سرکلر ریلوے چھ ماہ میں چلانے سمیت دیگر احکامات دیئے تھے۔

کراچی میں تجاوزات سے متعلق 110 مختلف درخواستیں  پرسماعت ہو گی جبکہ چیف جسٹس  جسٹس گلزار احمد کی سربراہی میں تین رکنی بینچ اہم مقدمات کی سماعت کرے گا۔

سندھ بلڈنگ کنٹرول اتھارٹی کا غیر قانونی تعمیرات کے خلاف بڑا ایکشن

اس ضمن میں عدالت کی جانب سے اٹارنی جنرل، ایڈووکیٹ جنرل سندھ اور دیگر اداروں کو نوٹس جاری کردیئے گئے ہیں۔

دوسری جانب صوبائی وزیر سعید غنی کے خلاف توہین عدالت کیس بھی سماعت کے لیے مقرر کردیا گیا ہے جبکہ ریلوے کی زمین پر قائم ہاؤسنگ سوسائٹی اور نارتھ کراچی، گلشن اقبال کے روڈز پر قائم تجاوزات سے متعلق   کیس کی بھی سماعت ہوگی اور کراچی میں  سرکاری خالی پلاٹس پر پارکس اور کھیلوں کے میدان بنانے سے متعلق  بھی پو چھاجائے گا۔

واضح رہے کہ گزشتہ روز ڈی جی ایس بی سی آشکار داور نے تمام غیر قانونی تعمیرات کے انہدامی آپریشن کا دورہ کیا جس کے بعد غیر قانونی تعمیرات کے خلاف شہر کے چھ مختلف علاقوں میں ایک ساتھ انہدامی کارروائی کا آغازکیا گیا۔

دورے کے دوران ڈی جی ایس بی سی نے چھ منزلہ غیر قانونی تعمیرات کو مکمل مسمار کرنے کا حکم دیدیا گیا ہے۔

ترجمان ایس بی سی اے کا کہنا ہے کہ ڈی جی کے احکامات پر شہر کی چھ مقامات پر مجموعی طور پر دس کروڑ سے زائد مالیت کی غیر قانونی تعمیرات کو مسمار کیا گیا جبکہ آپریشن کے دوران مزاحمت پر دو افراد کو علاقہ پولیس کے بھی حوالے کردیا گیا۔