وزیراعظم عمران خان نے کہا ہے کہ حکومت کی جانب سے گندم اور چینی کی وافر اور مناسب قیمتوں پر دستیابی یقینی بنانا اولین ترجیح ہے۔

تفصیلات کے مطابق وزیراعظم عمران خان کی زیرصدارت آٹے اور چینی کی قیمتوں سے متعلق جائزہ اجلاس منعقد کیا گیا ہے۔

دوران اجلاس وزیراعظم عمران خان کی جانب سے ہدایات جاری کی گئیں ہیں کہ بروقت کرشنگ سیزن شروع کرنے کے حوالے سے اقدامات اٹھائے جائیں۔

وزیراعظم کا اجلاس میں کہنا تھا کہ صوبائی دارالخلافوں میں فوڈ اینڈ ڈرگ ٹیسٹنگ لیبارٹریز کے قیام کیلئے بھی اقدامات کیے جائیں۔

مزید پڑھیں

گندم کی کمی پندرہ لاکھ ٹن تھی لیکن بحران کا تاثر دیا گیا، فخر امام

وزیر قومی تحفظ خوراک فخر امام کا کہنا ہے کہ گندم کی...

ان کا کہنا تھا کہ گندم اور چینی کی وافر اور مناسب قیمتوں پر دستیابی یقینی بنانا حکومت کی اولین ترجیح ہے اسی لئے غذائی تحفظ  کیلئے قلیل، وسط اور طویل المدتی پالیسی تشکیل دی جائے اور اس کے ساتھ ہی ساتھ گندم کی پیداوار بڑھانے کے لئے جدید  ٹیکنالوجی بروئےکار لائی جائے۔

وزیرِاعظم کی جانب سے فخر امام کی سربراہی میں وزراء پر مشتمل اعلیٰ سطحی کمیٹی کے قیام کی ہدایت دی گئی ہے۔

اجلاس کے دوران چیف سیکرٹریز نے وزیرِاعظم کو  گندم، آٹے اور چینی کی قیمتوں کے حوالے  سے صورتحال  سے آگاہ کیا گیا ہے جبکہ وزیر برائے صنعت نے چینی کی درآمد کے حوالے سے اب تک کی  پیش رفت سے بھی آگاہ کیا ہے۔

اجلاس میں صوبائی چیف سیکرٹریز نے ذخیرہ اندوزوں کے خلاف کریک ڈاؤن کے متعلق بریفنگ دی گئی۔

اجلاس میں سینٹر شبلی فراز، محمد حماد اظہر، فخر امام، عبدالحفیظ شیخ  ،مرزا شہزاد اکبر، عاصم سلیم باجوہ، ڈاکٹر شہباز گل بھی شریک ہوئے جبکہ عثمان ڈار، چاروں صوبائی چیف سیکرٹریز نے ویڈیولنک کے ذریعے اجلاس میں شرکت کو یقینی بنایا۔

یاد رہے کہ اس سے قبل پریس کانفرنس کرتے ہوئے وزیر قومی تحفظ خوراک فخر امام  کا  کہنا تھا کہ  چیزوں کی قلت کا معاملہ چند ماہ قبل شروع ہوا۔

وزیر قومی تحفظ خوراک نے کہا کہ  آٹھ نو سال بعد پہلی بار پاکستان کی ایکسپورٹ قیمت اور عالمی قیمت میں کافی فرق پیدا ہوا۔ ذخیرہ اندوزوں نے اس فرق کو سمجھتے ہوئے بہت فائدہ کمایا۔

فخر امام نے کہا کہ  ایک شپ آج گندم لے کر پہنچ رہی ہے، اٹھائیس اگست کو دوسری شپ آ رہی ہے اس سے گندم کی قیمت پر اچھے  اثرات  مرتب ہوں گے۔

انہوں نے کہا کہ  ستمبر کے آخر تک چار لاکھ اٹھاسی ہزار ٹن گندم پاکستان پہنچ جائے گی۔

وزیر قومی تحفظ خوراک نے کہا کہ گندم کی قلیل آلمدتی پالیسی بھی مرتب کی جائے گی جس سے ذخیرہ اندوزوں کو فائدہ اٹھانے  کا موقع کم ملے گا۔