وزیراعظم عمران خان کا کہنا ہے کہ  ملک کی ترقی کراچی کی ترقی سے وابستہ ہے۔

تفصیلات کے مطابق  وزیراعظم عمران خان کی زیر صدارت کراچی کے مسائل کے  مستقل  حل کے لیے “کراچی ٹرانسفارمیشن پلان”کے حوالے سے اعلیٰ سطحی اجلاس ہوا۔

اجلاس میں وفاقی وزراء اسد عمر، علی زیدی شریک ہوئے جبکہ  گورنر سندھ عمران اسماعیل ویڈیو لنک کے ذریعے  شریک ہوئے۔

چئیرمین این ڈی ایم اے لیفٹنٹ جنرل محمد افضل، متعلقہ وزارتوں کے سیکرٹریز و دیگر سینئر افسران  بھی اجلاس میں شریک ہوئے۔

وزیراعظم کو شہر قائد کے مسائل، پانی، سیوریج، نالوں  کی صفائی،  سالڈ ویسٹ منیجمنٹ پر بریفنگ دی گئی۔

ٹرانسپورٹ کے حوالے سے عوام کو درپیش مشکلات اور ان مسائل کے مستقل حل کے لیے مجوزہ  ’کراچی ٹرانسفارمیشن پلان‘پر تفصیلی بریفنگ دی گئی۔

وزارت منصوبہ بندی  کی جانب سے  ’کراچی ٹرانسفارمیشن پلان‘کے حوالے سے وزیراعظم کو پریزنٹیشن بھی دی گئی۔

وفاقی وزیر برائے منصوبہ بندی اسد عمر نے کہا کہ ’کراچی ٹرانسفارمیشن پلان‘کراچی کے مسائل  اور پاکستان کے معاشی حب کی ترقیاتی ضروریات کو مد نظر رکھ کر تشکیل دیا گیا ہے۔

اس موقع پر وزیر اعظم نے کہا کہ   کراچی  میں سالہا سال سے درپیش  عوامی مسائل کا مکمل ادراک ہے ۔  عوام کی مشکلات پر آنکھیں بند نہیں کر سکتے۔ ملک کی ترقی کراچی کی ترقی سے وابستہ ہے۔

عمران خان نے کہا کہ  کراچی کے مسائل کے حل اور ترقی کے لیے وفاق اپنا بھرپور کردار ادا کرے گا۔  تمام اسٹیک ہولڈرز کی مشاورت  سے رواں ہفتے  ’کراچی ٹرانسفارمیشن پلان‘کو حتمی شکل دی جائے گی۔

انہوں نے مزید کہا کہ پلان کی باقاعدہ منظوری کے بعد عمل درآمد کا کام شروع کیا جائے۔