وزیراعظم عمران خان کی جانب سے صحت انصاف کارڈ کا تفصیلی جائزہ لینے کا فیصلہ کیا گیا ہے۔

تفصیلات کے مطابق وزیراعظم صحت انصاف کارڈ کی تقسیم اور کارڈ میں مستحق کے لئے سہولتوں کا جائزہ لیں گے جبکہ پہلے مرحلے میں پنجاب کے صحت انصاف کارڈ کا جائزہ لیا جائے گا۔

صحت انصاف کارڈ کے تفصیلی جائزے کے دوسرے مرحلے میں خیبر پختونخوا میں ہیلتھ کارڈ کا جائزہ لیا جائے گا۔

وزیراعظم سے صوبائی وزیر صحت پنجاب کی ملاقات

اس ضمن میں وزیراعظم نے ڈاکٹر یاسمین راشد سے ہیلتھ کارڈ سے متعلق تفصیلی رپورٹ طلب کرلی کئی ہے۔

یاد رہے کہ وزیراعظم کو یاسمین راشد کی بریفنگ کے دوران بتایا گیا ہے کہ پبجاب میں 51 لاکھ کارڈ تقسیم  ہوچکے ،71 لاکھ کا ہدف ہے۔

اس سے قبل وزیراعظم عمران خان سے صوبائی وزیر صحت پنجاب ڈاکٹر یاسمین راشد کی ملاقات ہوئی ہے۔

ملاقات میں صوبہ پنجاب میں صحت انصاف کارڈ کی تقسیم  کے حوالے سے پیشرفت کا جائزہ لیا گیا اور ہیلتھ کارڈ ذریعے صحت کی سہولیات سے متعلق عوامی ردعمل پر بھی بات چیت کی گئی۔

وزیراعظم کا کہنا تھا کہ صحت انصاف کارڈ کے ذریعے معیاری صحت کی سہولیات کی فراہمی کو یقینی بنایا جائے۔

صوبائی وزیر صحت ڈاکٹر یاسمین راشد نے کہا ہے کہ عوام  کی جانب سے صحت انصاف کارڈ کے حوالے سے نہایت حوصلہ افزاء ردعمل سامنے آیا ہے۔

انہوں نے بتایا ہے کہ صحت انصاف کارڈ کی بدولت مستحق افراد اور ان کے خاندانوں کو صحت کے حوالے سے خاطر خواہ ریلیف میسر آیا ہے جس پر وزیراعظم کی جانب سے عوام کے مثبت ردعمل پر اطمینان کا اظہار بھی کیا گیا ہے۔

خیال رہے کہ گزشتہ سال فروری میں  صحت انصاف کارڈ کے اجرا کی تقریب سے خطاب کرتے ہوئے  وزیراعظم نے کہا تھا کہ پاکستان میں کئی خاندان صرف بیماری کی وجہ سے غریب ہوجاتے ہیں۔ غریب خاندان میں ایک بیمار کی وجہ سے سب ہی متاثر ہوتے ہیں جب کہ اپنوں کی تکلیف کا درد میں اچھی طرح سمجھ سکتا ہوں۔