وزیر اعظم کی ہدایت پر آج ملک بھر میں ٹائیگر فورس ڈے منایا جا رہا ہے۔

تفصیلات کے مطابق آج ملک بھر میں ٹائیگر فورس ڈے منایا جا رہا ہے، وزیر اعظم آج ملکی تاریخ کی سب سے بڑی شجر کاری مہم کا بھی آغاز کریں گے۔

 آج وزیر اعظم عمران خان ٹائیگر فورس ڈے کے موقع پر اسلام آباد میں پودا لگا کر بڑی شجر کاری مہم کا آغاز کریں گے۔

ذرائع کے مطابق پاکستان کو سر سبز و شاداب اور آلودگی سے پاک بنانے کے مشن کا آغاز ہو گیا۔

وزیراعظم نے قوم کو شجرکاری مہم میں شرکت کی دعوت دی ہے اور ان کا کہنا ہے کہ پاکستان موسمیاتی تبدیلیوں سے سب سے زیادہ متاثرہ ملکوں کی فہرست میں شامل ہے جس سے نمٹنے کیلئے شجرکاری انتہائی اہم اور ناگزیر ہے۔

I want everyone to join me tomorrow, 9 Aug, in planting trees all over Pak. Have asked my MPs, ministers, Chief Ministers and Tiger Force to participate in the biggest tree planting campaign in our history. The target is 35 lakh trees in a day though we will try to exceed it.

— Imran Khan (@ImranKhanPTI) August 8, 2020

وزیراعظم نے کہا ہے کہ خود شجرکاری مہم میں حصہ لوں گا، آئندہ نسل کے محفوظ مستقبل کیلئے شجرکاری ضروری ہے، وزراء و ارکان پارلیمنٹ بھی بڑھ چڑھ کرحصہ لیں۔

عمران خان نے ٹائیگر فورس اور طلبا سمیت پوری قوم سے شجرکاری مہم میں بھرپور حصہ لینے کی اپیل کی۔

 انہوں نے مزید کہا کہ 2023 تک 10 ارب درخت لگانا ہمارا ہدف ہے۔

واضح رہےکہ ملک میں پہلی بار شجر کاری مہم کے لیے جدید ٹیکنالوجی کا استعمال کیا جائے گا، وزیر اعظم ٹائیگر فورس ایپ میں گرین سیلفی فیچر کی منظوری دے چکے ہیں، ایپ میں جیو ٹیگنگ کی خصوصی سہولت بھی متعارف کروا دی گئی ہے۔

اس ایپ سے پودوں کی لائیو لوکیشن اور تعداد معلوم کی جا سکتی ہے، پودا لگانے والا رضا کار ایپ کے ذریعے اپنی گرین سیلفی اپلوڈ کر سکے گا، ایپ کا استعمال کرتے ہوئے چند گھنٹے میں 16 ہزار پودے لگائے گئے، یہ خصوصی ایپ پنجاب انفارمیشن ٹیکنالوجی بورڈ کے تعاون سے تیار کی گئی ہے۔