پیپلزپارٹی کی مرکزی ڈپٹی سیکریٹری اطلاعات پلوشہ خان نے سلیکٹڈ وزیراعظم کی  شجرکاری مہم کو بلین ٹریز کے بعد لوٹ مار کی ایک اور واردات قرار دیا ہے۔

تفصیلات کے مطابق پیپلزپارٹی کی مرکزی ڈپٹی سیکریٹری اطلاعات پلوشہ خان نے اپنے ایک بیان میں وزیراعظم عمران خان پر تنقید کرتے ہوئے کہا کہ ایک ارب درخت جادو کے ذریعے اگائے گئے جو عوام کی نظروں سے اوجھل رہے۔

پیپلزپارٹی کی مرکزی ڈپٹی سیکریٹری اطلاعات نے کہا کہ عمران خان کی حکومت ہی جعلی مینڈیٹ جھوٹے نعروں اور دھوکہ دہی کی بیساکھیوں پر کھڑی ہے۔

پلوشہ خان نے یہ بھی کہا کہ ایک کروڑ گھر دینے کا دھوکہ دے کر عوام سے اربوں روپے بٹورے گئے جبکہ دو سال گزر جانے کے باوجود ایک بھی پاکستانی کو گھر نہیں ملا۔

پیپلزپارٹی کی مرکزی ڈپٹی سیکریٹری اطلاعات کا لہنا تھا کہ نیازی صاحب آپ کا شو پٹ کر مک چکا ہے، عوام مہنگائی، بیروزگاری کی چکی میں پِس رہے ہیں۔

سیاسی مخالفت کی آڑ میں پی ٹی آئی ملک کو بدنام کررہی ہے، پلوشہ خان

پلوشہ خان کا یہ بھی کہنا تھا کہ وفاق، کے پی اور پنجاب میں سرکاری ملازمین کا معاشی استحصال کیا جا رہا ے جبکہ نہ ان کی تنخواہوں میں کوئی اضافہ کیا گیا ہے اور ان کو انکو سالانہ انکریمنٹ سے ہی محروم کر دیا گیا ہے۔

 پیپلزپارٹی کی مرکزی ڈپٹی سیکریٹری اطلاعات پلوشہ خان کا مزید کہنا تھا کہ ٹائیگر فورس کو پالنے کے لئے قومی خزانے پر ڈاکہ ڈالا جا رہا ہے اور ضروریات زندگی کی اشیاءکو مہنگا کرکے عوام کی جیبوں پر ڈاکے مارے جا رہے ہیں۔

واضح رہے اس سے قبل وزیراعظم عمران خان کے معاون خصوصی عثمان ڈار نے اپنے ایک بیان میں کہا تھا کہ اکثر اپوزیشن ارکان کو بھی پودے گننے کا شوق رہتا ہے، اپوزیشن ارکان اپلیکیشن ڈاؤن لوڈ کرکے گھر بیٹھے پودے گن سکیں گے۔

معاون خصوصی عثمان ڈار نےمزید کہا تھا کہ محکمہ جنگلات کے افسران بھی موبائل میں شجرکاری مہم کا ریکارڈ رکھیں گے۔