پنجاب حکومت نے انڈسٹریز،ہوٹل، ریسٹورنٹس، میرج ہال اور سینما تھیٹرکھولنے کا اصولی فیصلہ کیا ہے ، حتمی منظوری نیشنل کنٹرول اینڈ آپریشن سنٹر دے گا۔

تفصیلات کے مطابق وزیراعلیٰ پنجاب سردارعثمان بزدار کی ہدایت پر کابینہ کمیٹی برائے کورونا کنٹرول کا خصوصی اجلاس ہوا۔

اجلاس میں کہا گیا کہ جم،ان ڈور سپورٹس،بیوٹی سیلون او رکلینک وغیرہ کھولنے کا فیصلہ جبکہ مری اور دیگر سیاحتی مقامات کھولنے کاحتمی فیصلہ بھی این سی او سی کرے گی۔

پنجاب میں معاشی سرگرمیوں کے فروغ کے لئے کنسٹرکشن انڈسٹری سے متعلقہ دیگر کاروبار بھی کھول دئیے جائیں گے جبکہ تعلیمی ادارے کھولنے کے لئے کابینہ کمیٹی برائے کورونا کنٹرول کا خصوصی اجلاس بلایا جائے گا۔

ریسٹورنٹس کھولنے کے لئے کسی این او سی کی ضرورت نہیں

اجلاس میں بریفنگ کے دوران کہا گیا کہ پنجاب میں کورونا پازیٹو کیسز کی تعداد 2سے 3فیصد تک ہے جبکہ گزشتہ 24گھنٹے کےٓ دوران کورونا کے 39کیس رپورٹ جبکہ 5مریض جاں بحق ہوئے۔

صوبہ بھر میں کورونا کے خدشے کے پیش نظر 3ہزار بیڈز بدستور مختص رکھے جائیں گے جبکہ ہسپتال کورونا فری قرار دے کر معمول کی طبی خدمات کے لئے اوپن ہوں گے اور ہسپتالوں میں معمول کی بیماریوں کا علاج، آپریشن اور دیگر سروسز معمول کے مطابق فراہم کی جائیں گی۔

صوبائی وزراء ڈاکٹر یاسمین راشد،میاں اسلم اقبال، ہاشم جواں بخت،چیف سیکرٹری، سینئر ممبر بورڈآف ریونیو،پرنسپل سیکرٹری وزیراعلیٰ،سیکرٹری سپیشلائزڈ ہیلتھ کیئر،سیکرٹری پرائمری اینڈ سکینڈری ہیلتھ، سیکرٹری اطلاعات،ڈپٹی کمشنر لاہور،ڈی جی فوڈ اتھارٹی اوردیگر متعلقہ حکام بھی اس موقع پر موجود تھے۔-