وزیراعظم عمران خان کا کہنا ہے کہ معیاری تعلیم کے مواقع فراہم کرنا موجودہ حکومت کی اولین ترجیحات میں شامل ہے۔

تفصیلات کے مطابق وزیراعظم عمران خان کی زیر صدارت صوبہ خیبر پختونخواہ میں ہائر ایجوکیشن کے فروغ کے حوالے سے اقدامات پر جائزہ اجلاس ہوا۔

اجلاس میں وفاقی وزراءشفقت محمود، شبلی فراز سمیت  گورنر خیبر پختونخواہ شاہ فرمان، وزیر اعلیٰ خیبر پختونخواہ ، چیئرمین ہائر ایجوکیشن کمیشن طارق بنوری، مشیر وزیر اعلیٰ خیبر پختونخواہ برائے ہائر ایجوکیشن خلیق الرحمان شریک ہوئے۔

ان کے علاوہ  چیف سیکرٹری خیبر پختونخواہ اور خیبر پختونخواہ کی مختلف یونیورسٹیز کے موجودہ اور سابقہ وائس چانسلرز اور سینئر افسران نے بھی شرکت کی۔

پروفیسر ڈاکٹر عطاء الرحمان ویڈیو لنک کے ذریعے اجلاس میں شریک تھے۔

وزیر اعظم کو صوبے میں ہائر ایجوکیشن کے فروغ کے روڈمیپ پر عمل درآمد کے حوالے سے اقدامات اور مستقبل کے لائحہ عمل پر بریفنگ دی گئی۔

شرکاء کو صوبہ خیبر پختونخواہ میں جامعات میں معیاری تعلیم کی فراہمی اور میرٹ پر عملدرآمد سے متعلق آگاہ کیا گیا۔

تدریسی عمل میں  قابلیت کا مظاہرہ کرنے والے طلباء کی حوصلہ افزائی اور  جامعات کے تنظیمی امور میں نمایاں بہتری سے متعلق بھی بریفنگ دی گئی جبکہ  انفراسٹرکچر کی بحالی کے حوالے سے مجوزہ اقدامات  سے بھی آگاہ کیا گیا۔

اس موقع پر وزیر اعظم عمران خان نے کہا  معیاری تعلیم کے مواقع فراہم کرنا موجودہ حکومت کی اولین ترجیحات میں شامل ہے۔ملک و قوم کی ترقی اور خوشحالی میں معیاری تعلیم کی فراہمی کلیدی حیثیت رکھتی ہے۔

عمران خان نے کہا کہ  ہائر ایجوکیشن اور بنیادی تعلیم کے حوالے سے یکساں مواقع، میرٹ پر عملدرآمد اور اساتذہ و طلباء کے لیے سہولیات کی فراہمی کو یقینی بنایا جائے۔