وزیراعظم عمران خان نے کہا ہے کہ متعلقہ اداروں کی جانب سے ایسا طریقہ کار اختیار کیا جائے کہ تمام شعبہ جات کی توانائی کی ضروریات احسن طریقے سے پوری کی جا سکیں۔

تفصیلات کے مطابق وزیرِ اعظم عمران خان کی زیر صدارت توانائی کے شعبے میں جاری اصلاحات میں پیش رفت کے حوالے سے جائزہ اجلاس منعقد کیا گیا جس میں انہوں نے اظہار خیال کرتے ہوئے کہا ہے کہ توانائی کا شعبہ شدید بحران کا شکار ہے۔

اجلاس کے  دوران وزیراعظم کا کہنا ہے کہ ماضی میں کیے جانے والے مہنگی بجلی کے معاہدوں کے بوجھ سے نہ صرف عام آدمی اور صنعتی شعبہ متاثر ہوا ہے۔

انہوں نے بتایا ہے کہ سستی بجلی فراہم کرنے کی کوشش میں گردشی قرضوں کا پہاڑ کھڑا ہوگیا ہے جس کا سارا بوجھ سرکاری خزانے پر پڑ رہا ہے۔

وزیراعظم نے ہدایات جاری کی ہیں کہ بجلی کے شعبے میں اصلاحات کےحوالے سے بجلی کی پیداوار، ضروریات، سال کے مختلف مہینوں میں استعمال میں اتار چڑھاؤ کی شرح کا جائزہ لیا جائے اور پیداواری لاگت، فروخت اور ریونیو اور بجلی کے نرخوں کی وجہ سے دیگر شعبوں پر اثرات سمیت مختلف پہلوؤں کو مدنظر رکھ کر حکمت عملی اور روڈ میپ کا تعین کیا جائے تاکہ اس شعبے کو بحران سے نکالا جائے۔

انہوں نے مزید کہا ہے کہ سبسڈی کے نظام کو منصفانہ ، شفاف اور مستحقین تک موثر طریقے سے پہنچانے کے نظام پر خصوصی توجہ دی جائے۔

خیال رہے کہ اجلاس میں توانائی کے شعبے میں جاری اصلاحات کے عمل کو آگے بڑھانے، مختلف اہداف کے حصول کے لئے ٹائم فریم کے حوالے سے بریفنگ بھی دی گئی۔

یاد رہے کہ اجلاس میں اسد عمر، عمر ایوب، میاں محمد سومرو، ڈاکٹر عبدالحفیظ شیخ، شہزاد قاسم، ندیم بابر اور ڈاکٹر ثانیہ نشتر و دیگر سینئر افسران شریک ہوئے ہیں۔