وزیر اعظم عمران خا ن کا کہنا ہے کہ  کراچی کی ترقی وفاقی حکومت کے ایجنڈے میں شامل ہے۔

تفصیلات کے مطابق  مشیر پارلیمانی امور ڈاکٹر بابر اعوان  نے وزیراعظم  عمران خان سے ملاقات کی۔

ملاقات میں  ملکی تازہ سیاسی صورت حال ، ایف اے ٹی ایف سے متعلقہ قانون سازی ، کراچی ٹرانسفارمیشن پیکج سمیت پارلیمانی معاملات پر گفتگو  کی گئی۔

بابر اعوان نے قومی اسمبلی اور سینیٹ اجلاس سے متعلق بھی وزیر اعظم کو آگاہ کیا۔

اس موقع پر وزیر اعظم کا کہنا تھا کہ   سیاسی بد انتظامیوں کے باعث کراچی کے حالات بد ترین ہوئے ہیں۔  کراچی کی ترقی وفاقی حکومت کے ایجنڈے میں شامل ہے،  وفاق کراچی کے مسائل کے حل کے لیے مالی وسائل فراہم کرے گا۔

عمران خان نے کہا کہ  کراچی ٹرانسفارمیشن پیکج کے تحت منصوبوں پر جلد عملدرآمد ضروری ہے۔

وزیراعظم نے ایک بار پھر ایف اے ٹی ایف سے متعلق قانون سازی کے عمل کو جلد مکمل کرنے کے عزم کاا ظہار بھی کیا۔

مشیر پارلیمانی امور بابر اعوان نے کہا کہ  ملکی سلامتی سے متعلق قانون سازی میں تاخیر نہیں ہونے دیں گے۔

بابر اعوان کا مزید کہنا تھا کہ   کراچی کے لیے 1ہزار113ارب روپے کے تاریخی پیکج کا اعلان خوش آئند ہے۔ وفاقی حکومت نے معاشی حب کی بہتری کے لیے بروقت قدم اٹھایا ہے۔