اسپیکر چودھری پرویزالٰہی نے کہا ہے کہ موٹروے پولیس عوامی خدمت کے جذبے سے سرشار ہے۔

تفصیلات کے مطابق اسپیکر پنجاب اسمبلی چودھری پرویزالٰہی سے آل پاکستان پرائیویٹ سیکٹرز یونیورسٹیز ایسوسی ایشن کے چیئرمین پروفیسر ڈاکٹر چودھری عبدالرحمن اور ڈی آئی جی موٹروے پولیس محبوب اسلم کی ملاقات ہوئی۔

اسپیکر پنجاب اسمبلی چودھری پرویزالٰہی نے اعلیٰ تعلیم کے فروغ کیلئے نجی شعبے کے کردار کی تعریف کی اور موٹر وے پولیس کی کارکردگی کو سراہتے ہوئے محبوب اسلم کو اعزازی شیلڈ دی۔

 ڈی آئی جی موٹروے پولیس محبوب اسلم نے کہا کہ موٹر وے پولیس عوامی آگاہی کیلئے روڈ سیفٹی سیمینار منعقد کرواتی ہے، خواہش ہے کہ اس پروگرام میں ارکان پنجاب اسمبلی کو بھی مدعو کیا جائے۔

 پرویزالٰہی نے کہا کہ پرائیویٹ اور پبلک سیکٹر یونیورسٹیز کی اجتماعی جدوجہد سے معاشرے کو اعلیٰ تعلیم کے زیور سے آراستہ کیا جا سکتا ہے۔

اسپیکر چودھری پرویزالٰہی نے مزید کہا کہ موٹروے پولیس عوامی خدمت کے جذبے سے سرشار ہے، ارکان اسمبلی کی آگاہی کیلئے بھی جلد روڈ سیفٹی سیمینار منعقد کروائے جائیں گے۔

واضح رہے گزچؤشتہ روز قائم مقام گورنر پنجاب چودھری پرویزالٰہی سے وائس چانسلر جی سی یونیورسٹی اصغر زیدی کی ملاقات ہوئی تھی۔

چودھری پرویزالٰہی نے کہا تھا کہ تعلیمی سرگرمیاں کورونا کی وجہ سے کافی عرصہ سے بند ہیں، اب حکومت 15 ستمبر کو تعلیمی سرگرمیاں بحال کرنے کے بارے میں لائحہ عمل مرتب کر رہی ہے۔

قائم مقام گورنر پنجاب چودھری پرویزالٰہی نے مزید کہا تھا کہ طلبہ و طالبات ملک کا مستقبل ہیں لہٰذا کسی قسم کا کوئی رسک نہ لیا جائے جبکہ تعلیمی اداروں میں ایس او پیز پر سختی سے عمل کروایا جائے۔