وزیرِاعظم عمران خان نے کہا ہے کہ گندم کی وافر دستیابی کے ساتھ ساتھ مناسب قیمتوں کو یقینی بنانا بھی حکومت کی اولین ترجیح ہے۔

تفصیلات کے مطابق وزیرِاعظم عمران خان کی زیر صدارت گندم اور چینی کی دستیابی اور قیمتوں کے حوالے سے اعلیٰ سطح کا اجلاس ہوا جس میں نجی شعبے کی جانب سے اب تک درآمد کی جا نے والی گندم کی مقدار اور آئندہ چند دنوں میں ملک میں پہنچنے والی گندم کی صورتحال پر وزیراعظم کو بریفنگ دی گئی۔

اجلاس میں وزیراعظم کو گندم کی دستیابی کی صورتحال، صوبہ پنجاب کی جانب سے یومیہ ریلیز پر بریفنگ دی گئی جبکہ گندم اور آٹے کی قیمت کی صورتحال ،مستقبل کی ضروریات کو پورا کرنے کے حوالے سے گندم اور چینی کی درآمد کی صورتحال پر بھی بریفنگ دی گئی۔

 محمد حماد اظہر نے بھی چینی کی موجودہ قیمتوں اور درآمد کے حوالے سے صورتحال پر بھی وزیرِاعظم کو بریفنگ دی۔

اجلاس میں فیصلہ کیا گیا کہ گندم کی وافر مقدار میں فراہمی کو یقینی  بنانے کے لئے نجی شعبے کے ساتھ ساتھ ٹی سی پی کی جانب سے بھی گندم درآمد کی جائے گی۔

وزیراعظم نے ملک میں گندم کی  دستیابی کی موجودہ تسلی بخش صورتحال اور صوبہ پنجاب کی جانب سے باقاعدگی سے گندم کی ریلیز پر اطمینان کا اظہار کیا۔

وزیرِاعظم عمران خان نے اجلاس کی صدارت کرتے ہوئے کہا کہ عوام کو بنیادی خوراک کے ضمن میں کسی قسم کا دقت کا سامنا نہ کرنا پڑے، مستقبل کی ضروریات کے حوالے سے بروقت پیشگی انتظامات کو یقینی بنایا جائے جبکہ گندم کی وافر دستیابی کے ساتھ ساتھ مناسب قیمتوں کو یقینی بنانا بھی حکومت کی اولین ترجیح ہے۔

اجلاس میں محمد حماد اظہر، سینیٹر شبلی فراز، سید فخر امام، مشیر خزانہ ڈاکٹر عبدالحفیظ شیخ ، مرزا شہزاد اکبر، ڈاکٹر شہباز گل، گورنر سٹیٹ بنک بھی شریک ہوئے جبکہ وزیرِ خوراک پنجاب عبدالعلیم خان، متعلقہ محکموں کے سیکرٹریز جبکہ چیف سیکرٹریز نے ویڈیو لنک کے ذریعے اجلاس میں شرکت کی۔