فیاض الحسن چوہان کا کہنا ہے کہ مہنگائی کی آڑ میں مکس اچار پارٹی اپنی کھربوں ڈالرز کی کرپشن پر پردہ ڈالنے کے چکر میں ہے۔ 

تفصیلات کے مطابق وزیر اطلاعات پنجاب فیاض الحسن چوہان نے اپنے حالیہ بیان میں کہا ہے کہ بزدار حکومت مہنگائی کنٹرول کرنے اور عوام کو ریلیف دینے کے لیے ہر ممکن اقدامات کر رہی ہے،بزدار حکومت نے گزشتہ دس سال کا ریکارڈ توڑتے ہوئے اکتالیس لاکھ ٹن گندم کا ہدف حاصل کیا۔

انھوں نے کہا کہ پنجاب حکومت نے چودہ سو روپے فی من پر مقررہ مدت سے دو ماہ پہلے فلور ملوں کو گندم ریلیز کرنا شروع کر دی ، گزشتہ تین ماہ سے بزدار حکومت روزانہ سترہ ہزار میٹرک ٹن گندم فلور ملز کو ریلیز کر رہی ہے۔

 وزیر اطلاعات پنجاب نے بتا یا کہ بزدار حکومت گندم کی ریلیز کو بتدریج 21 ہزار میٹرک ٹن روزانہ تک بڑھائے گی ،اب تک بزدار حکومت فلور ملوں کو ساڑھے بارہ لاکھ ٹن سے زائد گندم ریلیز کر چکی ہے،پنجاب میں قیمتوں اور آٹے کی فراہمی کے حوالے سے انسپیکشن کمیٹیاں تشکیل دینے کا فیصلہ بھی کیا گیا ہے۔

سندھ حکومت نے گزشتہ سال حکومت کے خلاف سازش کرتے ہوئے گندم کی پروکیورمنٹ نہ کر کے مصنوعی بحران پیدا کیا، سندھ نےپاسکو سے پانچ لاکھ ٹن کے کوٹے میں سے رواں سال جنوری تک بھاگم بھاگ دو لاکھ ٹن گندم وصول کی۔

دوسری جانب سندھ حکومت نے ابھی تک فلور ملوں کو ایک دانہ گندم ریلیز نہیں کی۔

انھوں نے مزید کہا کہ احتساب کا کدو کٹے گا تو سب میں بٹے گا، مکس اچار پارٹی کو جلسوں کی آڑ میں عوام کو بےوقوف بنانے کی اجازت نہیں دی جائے گی۔