پاکستان تحریک انصاف کے ایم پی اے خرم شیر زمان نے کہا ہے کہ سندھ حکومت کی بہتر کارکردگی کے باعث ان کی سیاست دفن ہونے والی ہے کیونکہ سندھ میں گندم کا بحران اٹھ رہا ہے۔

تفصیلات کے مطابق پاکستان تحریک انصاف کی جانب سے گندم کے حوالے سے سندھ اسمبلی میں مذمتی قراردار جمع کرائی گئی ہے جبکہ قرارداد ایم پی اے خرم شیر زمان کی جانب سے سیکرٹری سندھ اسمبلی کو جمع کرائی گئی ہے۔

قرار داد جمع کرانے کے بعد میڈیا سے گفتگو کرتے ہوئے خرم شیر زمان نے کہا کہ حکومت سندھ ساڑھے 12 لاکھ ٹن گندم ریلیز کرے۔

انہوں نے تنقید کرتے ہوئے کہا کہ پیپلزپارٹی نے کل ریلی نکالی لیکن ہم پریشان تھے کہ ایسا کیا کارنامہ سرانجام دیدیا ہے جو ریلیاں نکال رہے ہیں جبکہ بلاول زرداری نے گندم ریلیز نہ کرنے کی قسم اٹھائی ہوئی ہے۔

انہوں نے مزید کہا کہ بلاول بھٹو بتائیں کہ غریب کو گندم کب ملے گی؟ یہ بتائے کہ سندھ کے لوگوں کو کس جرم کی سزادی جارہی ہے، ایک طرف بلاول دبئی میں عیاشیاں اورشاپنگ کررہے ہیں اور دوسری طرف زرداری صاحب آرام فرما رہے ہیں۔

خرم شیر زمان کا کہنا تھا کہ نالائق اعلی کو کچھ بھی پتہ نہیں ہے کہ ساڑے 12 لاکھ ٹن گندم گودام میں پڑی ہے۔

پی ٹی آئی کے ایم پی اے کا کہنا تھا کہ ہم پیپلزپارٹی کے خلاف ریلی نکالیں گے، اتحادیوں سمیت پیپلزپارٹی پریشان ہیں کیونکہ سارے بلیک میلرز سرگرم ہیں۔

انہوں نے کہا کہ چیف جسٹس تحقیقات کریں۔ سندھ میں گندم کی بوریوں سے ریتی بجری نکل رہی ہے اور اسکی وجہ سے کہیں گندم کی وجہ سے فسادات نہ جنم لیں۔