گلگت بلتستان میں انتخابی مہم کا آج آخری روز ہے۔

تفصیلات کے مطابق انتخابات کے سلسلے میں گلگت بلتستان میں 14 سے 16 نومبر تک عام تعطیل ہوگی، الیکشن کمیشن سیکریٹریٹ کی جانب سے نوٹیفکیشن جاری کر دیاگیا۔

ذرائع کے مطابق رات بارہ بجتے ہی تمام انتخابی سرگرمیاں بند ہوجائیں گی جبکہ انتخابی معرکے میں ایک روز باقی ہے ، 23 نشستوں پر پولنگ 15 نومبر کو ہوگی۔

انتخابات کے انعقاد کے لیے الیکشن کمیشن کی جانب سے تمام حلقوں میں انتخابی سامان کی ترسیل کا عمل جاری ہے۔

انتخابی ڈیوٹی کے لیے چاروں صوبوں سے پولیس کے دستے بھی گلگت بلتستان پہنچ گئے ہیں۔

مزید پڑھیں

گلگت بلتستان میں مقبول ترین لیڈرکون؟

گلگت بلتستان میں صوبائی اتخابات کی تیاریاں عروج ہیں اور ملک کی...

واضح رہے کہ چیئرمین پیپلز پارٹی بلاول بھٹو کا گزشتہ روز گلگت بلتستان میں انتخابی مہم کا 24 واں دن تھا، اور آج وہ گلگت شہر میں انتخابی مہم کے آخری جلسے سے خطاب کرنے والے ہیں، وہ اب تک جی بی کے 3 ڈویژنز، 10 اضلاع میں 40 کارنر میٹنگز کر چکے ہیں۔

دوسری جانب مسلم لیگ ن کی نائب صدر اورسابق وزیراعظم نواز شریف کی صاحبزادی مریم نواز گزشتہ روز اپنی انتخابی مہم مکمل کر کے گلگت بلتستان سے روانہ ہو گئی ، ان کے ہمراہ شاہد خاقان عباسی اور دیگر رہنما بھی تھے۔

مریم نواز الیکشن کمپین کے سلسلے میں گلگت بلتستان کے مختلف حلقوں کے دورے پر تھی۔

پارٹی کی جانب سے جاری بیان کے مطابق مسلم لیگ (ن) خیبرپختونخوا کے صدر انجینئر امیر مقام کی میزبانی میں 13 نومبر کو بروز جمعہ(آج) دوپہر 2 بجے سوات کے گراسی گراونڈ میں جلسہ کرے گی۔

 مسلم لیگ (ن) کے قائد میاں نوازشریف وڈیو لنک کے ذریعے خطاب کر ینگے جبکہ نائب صدر مریم نوازشریف اور پارٹی کے دیگر مرکزی قائدین بھی جلسہ عام سے خطاب کریں گے