کراچی میں سرکلر ریلوے بحال ہوگئی ہے،مسافروں کو لے کر بن قاسم اسٹیشن سے روانہ ہونے والی ٹرینیں اپنی منزل پر پہنچ گئی ہیں۔

تفصیلات کے مطابق وفاقی وزیر ریلوے شیخ رشید نے گزشتہ روز کراچی سرکلرٹرین کا افتتاح کیا۔

 نامکمل کراچی سرکلرٹرین کا افتتاح کیا گیا ،جس کے بعد شہری آج سے کراچی سٹی سے پیپری تک سفر کرسکیں گے۔

سرکلرٹرین کا روٹ مختصراورٹرینوں کی تعدادمحدودکردی گئی ہے ، کراچی سرکلر ٹرین چلانے کے فیصلے میں آخری وقت میں مکمل تبدیلی کردی گئی تھی اور سرکلر ٹرین کراچی سٹی سے اورنگی تک چلانے کا فیصلہ مؤخرکردیا گیا۔

کراچی سرکلر ریلوے کی دس کوچز اور چارانجن پیپری سے اورنگی اپ اینڈ ڈاون چلائیں جائیں گے، بوگیوں میں آرم دہ نشستوں کے علاوہ علاوہ واش رومز، پنکھے، ٹی وی،وائی فائی اور موبائل چارج کرنے کی سہولیات بھی موجود ہوں گی۔

ریلوے ٹریک کے اطراف تاحال تجاوزات اور پکی کنسٹریکشن موجود ہے، ریلوے ذرائع کا کہنا ہے کراچی سٹی تا اورنگی کا روٹ دسمبر میں بھی بحال ہونا ممکن نہیں ہے۔

حکام کا کہنا ہے کہ کراچی سرکلر ریلوے کی ٹرنیں صبح ساڑھے چھ بجے سے شروع ہوں گی۔ ایک وقت میں دو ٹرینیں روانہ ہوں گی، ایک مارشلنگ یارڈ پپری ریلوے سٹیشن سے سٹی اسٹیشن تک اور دوسری اورنگی اسٹیشن سے سٹی اسٹیشن تک۔

دونوں اسٹیشنوں سے ایک دن میں چار ٹرینیں چلیں گی۔

ہر ٹرین کے ساتھ پانچ بوگیاں ہوں گی اور ہر بوگی میں 100 مسافر ہوں گے۔

ہر ٹرین میں 500 مسافر سفر کرسکیں گے اور روزانہ آٹھ ٹرینیں چلیں گی۔

کراچی سرکلر ریلوے سے روزانہ چار ہزار مسافر سفر کر سکیں گے۔

وفاقی وزیر ریلوے شیخ رشید کا کہنا تھا کہ کراچی سرکلر ریلوے 25 سال بعد شروع ہورہی ہے۔

انھوں نے کہا کہ 40 کلومیٹر ٹریک مکمل کیا ہے، 13 اسٹاپ کے ساتھ سروس شروع کررہے ہیں، کراچی سرکلر ریلوے کا سارا کریڈٹ چیف جسٹس کو جاتا ہے، دوسال میں ٹریک بنے گا، یہ ایک دو دن کی بات نہیں ہے۔

 شیخ رشید نے مزید کہا کہ سندھ حکومت کیساتھ مل کر کے سی آر چلانا چاہتے ہیں، کےسی آر25سال سے بند ہے ، 100مسائل ہیں ، 25 سال کا مردہ ٹریک زندہ ہورہا ہے، یہ چیف جسٹس کی کاوش ہے۔