چیف الیکشن کمشنر گلگت بلتستان راجا شہباز نے بلاول بھٹو کی جانب سے الیکشن کے حوالے سے لگائے جانے والے الزامات مسترد کردئیے ہیں۔

تفصیلات کے مطابق میڈیا سے گفتگو کرتے ہوئے چیف الیکشن کمشنر گلگت بلتستان راجا شہباز نے کہا ہے کہ بلاول ایک بڑی جماعت کے سربراہ ہیں، انہیں اس طرح کے باتیں زیب نہیں دیتی۔

انہوں نے کہا ہے کہ حقیقت کو سامنے رکھ کر بات کریں، ہوا میں تیر نہ چلائیں اور یہ تمام  واویلا کرنے والے الیکشن کمیشن میں ثبوت لاکررجوع کریں۔

انہوں نے کہا کہ جی بی کےعوام میں غلط فہمیاں پیدا کرنے کی کوشش کی جارہی ہے، کچھ جماعتیں الیکشن کو داغدار کرنا چاہتی ہیں تاہم کوئی بھی انتخابی عمل آئین کےخلاف ہوا ہےتو ثابت کریں۔

یاد رہے کہ اس سے قبل بلاول بھٹو نے کہا کہ گلگت بلتستان کی عوام نے پیپلز پارٹی کو زیادہ ووٹ دیئے لیکن فائنل نتیجہ نہیں بتایا جا رہا اور اب آر ٹی ایس کا بہانہ نہیں ہے، پیپلز پارٹی خواتین کے ووٹوں کے حقوق کا تحفظ کرے گی، الیکشن کمشنر نےعوام کو بیچ دیا وہ اپنا عہدہ نہیں سنبھال سکے۔

چئیرمین پاکستان پیپلز پارٹی نے کہا کہ جی بی 21 میں پولنگ بکس چوری ہوا تھا اور پیپلز پارٹی کارکنان نے دھاندلی کے خلاف سرد موسم میں احتجاج کیا۔

انہوں نے کہا کہ الیکشن کمیشن پاکستان تحریک انصاف (پی ٹی آئی) کا الیکشن ونگ ہے، کیا الیکشن کمشنر دو ماہ کے لیے عہدے پر بیٹھنا چاہتے ہیں لیکن یہ حکومت تو جنوری تک ہو گی۔