وزیر اعظم عمران خان کا کہنا ہے کہ ملکی ترقی و خوشحالی صنعتی شعبے اور کاروباری طبقے کی ترقی سے وابستہ ہے۔

تفصیلات کے مطابق   وزیر اعظم عمران خان سے ملک کے معروف  صنعتکاروں پر مشتمل وفد نے ملاقات کی۔

وفد میں اعظم فاروق ،بشیر علی محمد ،محمد علی تابہ ،ثاقب شیرازی ،  فواد مختارِعارف حبیب  اور حسین داؤد شامل تھے۔

ملاقات میں حماد اظہر،عبدالرزاق داؤد، ڈاکٹر عبدالحفیظ شیخ اور ڈاکٹر عشرت حسین کے علاوہ اعلیٰ سرکاری حکام بھی شریک  تھے۔

وفد کے شرکاء  نے وزیراعظم سے اظہار تشکر کرتے ہوئے کہا کہ  کاروباری سرگرمیوں کو میسرحکومتی سرپرستی کے مثبت نتائج آنا شروع ہو چکے ہیں ۔

وفد کا کہنا تھا کہ  ملکی فارن ایکسچینج ریزرو کا بلند ترین سطح پر ہونا پاکستان کی معیشت میں استحکام کی عکاسی کرتا ہے۔  حکومتی معاشی ٹیم ہر وقت ان کی رہنمائی اور مسائل کے حل  کے لیے دستیاب ہوتی ہے۔

وفد نے مزید کہا کہ   حکومتی کاوشوں سے پاکستان  کے کرنٹ اکاؤنٹ کا خسارے سے نکل کر سر پلس ہونا معیشت  کے لیے انتہائی خوش آئند ہے۔

وفد کے شرکاء  نے وزیراعظم کی تعمیراتی شعبے کی سرپرستی پر شکریہ ادا کرتے ہوئے کہا کہ   اس وقت سیمنٹ کی کھپت ملکی تاریخ کی بلند ترین سطح پر ہے۔

وفد نے کہا کہ  کورونا وبا ءکے باوجود تعمیراتی سرگرمیوں میں تیزی اور ٹیکسٹائل برآمدات میں اضافے سے معیشت پر مثبت اثرات مرتب ہو چکے ہیں۔  لوگوں کو روزگار کے مواقع ملے ہیں۔

 وفد کے شرکاء نے حکومتی پالیسیوں پر مکمل اعتماد کا اظہار کرتے ہوئے  معیشت کی بہتری  کے لیے اپنے خدمات پیش کیں۔

اس موقع پر وزیر اعظم نے کہا کہ  حکومت کا کام صنعتوں اور کاروباری سرگرمیوں  کے لیے آسانیاں اور سہولتیں فراہم کرنا ہے۔ ملکی ترقی و خوشحالی صنعتی شعبے اور کاروباری طبقے کی ترقی سے وابستہ ہے۔

عمران خان کا کہنا تھا کہ  حکومتی فیصلہ سازی کے عمل میں صنعتکاروں کی تجاویز کو شامل کیا جا رہا ہے جس سے   مثبت اثرات مرتب ہو رہے ہیں۔

وزیر اعظم  نے صنعتکاروں کو ایکسپورٹس میں پیش آنے والے مشکلات کو جلد از جلد حل کرنے کی ہدایت کی اور  صنعتکاروں سے زراعت کے شعبے میں جدت لانے سے متعلق تجاویز مانگ لیں۔

وزیراعظم نے مختلف فصلوں کی پیداواری صلاحیت  بڑھانے  کے لیے بڑے پیمانے پرکارپوریٹ فارمنگ شروع کرنے  کے لیے تجاویز مانگ لیں۔