ملک بھر میں تعلیمی اداروں میں بڑھتے ہوئے کورونا کیسز پر وفاقی وزیر تعلیم شفقت محمود کی زیر صدارت بین الصوبائی وزرائے تعلیم کانفرنس آج ہوگی۔

تفصیلات کے مطابق وفاقی وزیر تعلیم شفقت محمود کی زیر صدارت منعقد ہونے والے اس اہم اجلاس میں چاروں صوبوں، آزاد کشمیراور گلگت بلتستان کے وزرائے تعلیم شریک ہوں گے۔

صوبائی وزرائے تعلیم، اعلیٰ حکام اجلاس میں ویڈیو لنک کے ذریعے شرکت کریں گے۔

اجلاس میں اس بات کا بھی جائزہ لیا جائے گا کہ مختلف تعلیمی اداروں میں کورونا وائرس کے کیسز تسلسل کے ساتھ رپورٹ ہو رہے ہیں۔

وزرائے تعلیم کانفرنس میں تین نکاتی ایجنڈا پر مشاورت ہوگی۔

اجلاس میں کورونا کی صورتحال کا جائزہ لیا جائے گا۔

موسم سرما کی تعطیلات سے متعلق اہم فیصلہ بھی کیا جائے گا۔

تعلیمی سال اپریل سے اگست منتقل کرنے پر مشاورت ہوگی، آٹھویں کلاس کے بورڈ امتحانات پر بھی غور ہوگا۔

واضح رہےکہ نیشنل کمانڈاینڈآپریشن سینٹر نے کورونا کی صورتحال کے تازہ ترین اعداد و شمار جاری کردیئے۔

 پاکستان میں کورونا کے وار تیز ہونے لگے ہیں ،ایک دن میں 26 مریض انتقال کرگئے، جس کے بعد اموات کی تعداد 6 ہزار 893 ہوگئی جبکہ ایک ہزار302 نئے کیس رپورٹ ہوئے۔

 معاون خصوصی ڈاکٹر فیصل سلطان کا کہنا تھا کہ کورونا کیسز کی تعداد میں بتدریج اضافہ ہو رہا ہے، مثبت کیسز کی یومیہ شرح 4.9 فیصد تک پہنچ گئی ہے ، شہریوں کو کورونا ایس او پیز پر سختی سے عملدرآمد کرنا ہوگا۔