وفاقی وزیر اطلاعات شبلی فراز کا کہنا ہے کہ وزیر اعظم کا کوئی ذاتی مفاد نہیں ہے ،ان کا مشن پاکستان کو خوشحال بنانا ہے۔

کوہاٹ میں میڈیا سے گفتگو کرتے ہوئے وفاقی وزیر اطلاعات و نشریات سینیٹر شبلی فراز  کا کہنا تھا کہ پی ٹی آئی حکومت نے کوہاٹ اور جنوبی اضلاع کی ترقی پر توجہ دی ہے۔

شبلی فراز نے کہا کہ  حکومت نے بنیادی ڈھانچے کی ترقی اور عوام کو سہولتوں کی فراہمی پر توجہ دی ہے۔ ہکلہ۔کوہاٹ شاہراہ کی تکمیل سے علاقے کے عوام کو بہت فائدہ ہو گا۔

انہوں نے مزید کہا کہ  تحریک انصاف حکومت میں آئی تو معاشی چیلنجز درپیش تھے۔بدقسمتی سے ماضی کی حکومتوں نے ذاتی مفادات کو ملکی مفاد پر ترجیح دی۔  وزیراعظم عمران خان کا کوئی ذاتی مفاد نہیں،ان کا مشن پاکستان کو خوشحال بنانا ہے۔

وفاقی وزیر اطلاعات نے کہا کہ  حکومت کی تمام پالیسیوں کا محور پسماندہ طبقے کی بحالی ہے۔ خیبر پختونخوا کے ہر شہری کو 10لاکھ روپے تک مفت علاج کی سہولت فراہم کی گئی ہے۔

شبلی فراز نے کہا کہ  معیشت کا پہیہ چلانے کے لیے صنعتوں اور کاروبار کے لیے خصوصی پیکج دیا گیا ۔ عالمی سطح پر پاکستان کی پالیسیوں کو سراہا گیا۔ایسا نظام بنائیں گے جس میں عوام فیصلے کریں گے۔

ان کا کہنا تھا کہ کورونا صورتحال میں پسماندہ اور غریب طبقے  کے لیے خصوصی مالی پیکج دیا گیا۔احساس پروگرام اور صحت کارڈ عوامی فلاح کے منصوبے ہیں۔

وزیر اطلاعات نے کہا کہ  میرٹ کا نظام اور شفافیت حکومت کی اہم ترجیح ہے۔