وزیراعظم عمران خان کا کہنا ہے کہ  گلگت بلتستان کو صوبائی حیثیت دینے  کے لیے فوری کام کریں گے۔

گلگت بلتستان  میں نومنتخب کابینہ کی تقریب حلف برداری سے خطاب کرتے ہوئے وزیر اعظم عمران خان نے کہا کہ  گلگت بلتستان کی نومنتخب کابینہ اور وزیراعلیٰ کو مبارکباد دیتا ہوں، گلگت بلتستان حکومت ایک نئی روایت قائم کرے گی۔

وزیر اعظم نے کہا کہ  گلگت بلتستان کو جس راستے پر ڈالیں گے عوام کی زندگی بدل جائے گی، گلگت بلتستان کو صوبائی حیثیت دینے  کے لیے فوری کام کریں گے۔

عمران خان کا کہنا تھا کہ گلگت بلتستان کے لوگوں کو وسائل دینے کے خواہاں ہیں، گلگت بلتستان کو صوبائی حیثیت دینے  کے لیے کمیٹی بنائیں گے۔

 انہوں نے کہا کہ گلگت بلتستان حکومت گورننس کے نئے معیار قائم کرے گی۔گلگت بلتستان کے مسائل سے واقف ہوں۔ گلگت بلتستان میں سیاحت کو فروغ دیں گے، سیاحت کو فروغ دینے  کے لیے سستے قرضے دیے جائیں گے، قرضوں سے لوگوں کی آمدنی میں بھی اضافہ ہوگا۔

وزیراعظم نے گلگت بلتستان کے عوام کو صحت کارڈ دینے کا اعلان کرتے ہوئے کہا کہ لوگوں  کے لیے صحت کارڈ لےکر آرہے ہیں جس سے وہ 10 لاکھ روپے تک کا کسی بھی اسپتال میں فری علاج کرا سکیں گے۔

عمران خان نے مزید کہا کہ  گلگت بلتستان میں احساس پروگرام  بھی لے کر آرہے ہیں۔گلگت بلتستان کو احساس پروگرام کی سب سے زیادہ ضرورت ہے۔

انہوں نے کہا کہ حرام کا پیسہ اللہ کی لعنت ہے، نواز شریف اور آصف زرداری کو 40 سال سے جانتا ہوں، نواز شریف اور آصف زرداری پر اللہ کا عذاب آتے دیکھا ہے۔