وزیراعظم عمران خان نے کہا ہے کہ اللہ تعالیٰ نے پاکستان کو بہت خاص ملک بنایا ہے، انشااللہ دنیا دیکھے گی پاکستان ایک عظیم ملک بنے گا۔

ملکی ترقی کے حوالے سے بات کرتے ہوئے وزیراعظم عمران خان نے کہا ہے کہ چین کے ساتھ مل کرزرعی پیداوار کو بڑھانے کی کوشش کررہے ہیں اور ہم سی پیک میں خصوصی اقتصادی زون بنارہے ہیں۔

وزیراعظم کا کہنا تھا کہ آئندہ دنوں میں ہم صرف سیاحت کو ٹھیک کرلیں تو بہت زیادہ ڈالرز آجائینگے جیسا کہ سوئٹرزلینڈ سیاحت سے 80ارب ڈالر کماتاہے اور ہمارے شمالی علاقہ جات سوئٹزرلینڈ پلس ہیں۔

وزیراعظم کا مزید کہنا تھا کہ میرے لئے مشکل یہ ہے کہ مجھے دوسرے ملکوں سے پیسے مانگنے پڑتے ہیں کیونکہ جب آپ دوسرے ملکوں میں پیسے مانگنے جاتے ہیں یہ ملک کی توہین ہے لیکن آج ہمارا سب سے بڑا مسئلہ قرضے ہیں۔

وزیراعظم کا کہنا تھا کہ ہم دنیا میں کم ٹیکس دینے والی قوم ہیں، اگر یہ لوگ ٹیکس دینا شروع کردیں تو مسائل حل ہوجائیں جبکہ ہمارے ہاں ٹیکس دہندگان صرف 15 لاکھ ہیں۔

وزیراعظم نے بتایا ہے کہ کراچی میں مقامی حکومتوں کا نظام بہت اہم ہے اور کراچی پیکج پر سندھ حکومت کے ساتھ ملکر کام کررہے ہیں۔

انہوں نے کہا کہ اپوزیشن کی طرف سے لاہور میں اجتماع منعقد کرنے کی راہ میں کوئی رکاوٹیں پیدا نہیں کی جائیں گی لیکن قانون کو ہاتھ میں لینے والوں کے خلاف کارروائی کی جائے گی۔

وزیر اعظم نے کہا کہ ملک میں کورونا وائرس کے معاملات میں اضافے کے پیش نظر ، انہوں نے اپنی عوامی جلسوں کو منسوخ کردیا۔ انہوں نے کہا کہ ہماری توجہ اب کوڈ سے متعلقہ ایس او پیز کی تعمیل کو یقینی بنانے پر ہے۔ انڈور ریستوراں کے ساتھ ساتھ تعلیمی ادارے بھی بند کردیئے گئے ہیں۔

ایک سوال کے جواب میں وزیر اعظم عمران خان نے کہا کہ آئندہ سال سے یکساں نصاب متعارف کروا کر نظام تعلیم کو بنیادی نظریہ بنایا جارہا ہے۔

انہوں نے کہا کہ کلاس آٹھویں اور میٹرک کے طلباء کو سیرت النبی مضمون پڑھایا جائے گا۔ انہوں نے کہا کہ القدیر یونیورسٹی جو اگلے سال مکمل ہوجائے گی ، وہ نبی پاک حضرت محمد صلی اللہ علیہ وآلہ وسلم کی زندگی اور تعلیمات پر تحقیق کو فروغ دے گی اور ساتھ ہی تصوف کی بھی تعلیم دی جائے گی۔

وزیر اعظم نے کہا کہ دینی مدارس نے اپنے طلبا کو عصری مضامین کی تعلیم پر بھی اتفاق کیا ہے۔

ان تمام خیالات کا اظہار وزیراعظم عمران خان نے ایک نجی ٹی وی چینل سے گفتگو کے دوران کیا ہے جبکہ انٹرویو پاکستان کے معروف میزبان و اینکر پرسن حمزہ علی عباسی کی جانب سے لیا گیا ہے۔