آرمی چیف جنرل قمر جاوید باجوہ اور وزیراعظم عمران خان کی جانب سے سابق وزیراعظم ظفراللہ جمالی کی وفات پر اظہار افسوس کیا گیا ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے سابق وزیراعظم ظفراللہ جمالی کی وفات پر افسوس کا اظہار کیا ہے۔

General Qamar Javed Bajwa, #COAS, expresses heartfelt condolences on the sad demise of former Prime Minister of Pakistan Mir Zafarullah Khan Jamali. “May Allah bless his soul & give strength to the bereaved family to bear this irreparable loss, Ameen”, COAS.

— DG ISPR (@OfficialDGISPR) December 2, 2020

آرمی چیف نے اپنے  تعزیتی بیان میں دعائیہ کملات استعمال کرتے ہوئے کہا ہے کہ اللہ مرحوم کی مغفرت فرمائے، لواحقین کو صبر دے۔

علاوہ ازیں وزیراعظم عمران خان نے بھی سابق وزیراعظم ظفراللہ جمالی کی وفات پر گہرے دکھ اور افسوس کا اظہار کیا ہے۔

Saddened to hear of the passing of Mir Zafarullah Khan Jamali. My condolences and prayers go to his family.

— Imran Khan (@ImranKhanPTI) December 2, 2020

اپنے پیغام میں وزیراعظم نے دعائیہ کلمات استعمال کرتے ہوئے سابق وزیراعظم ظفراللہ جمالی کی مغفرت کے لئے دعا کی ہے۔

یاد رہے کہ سابق وزیراعظم ظفراللہ جمالی کو دل کا دورہ پڑنے پر نجی اسپتال کے آئی سی یو میں منتقل کیا گیا تھا جہاں وہ انتقال کرگئے۔
پاکستان کے سابق وزیر اعظم میر ظفر اللہ خان جمالی یکم جنوری 1944ء کو بلوچستان کے ضلع نصیرآباد کے گائوں روجھان جمالی میں پیدا ہوئے ۔

ابتدائی تعلیم روجھان جمالی میں ہی حاصل کی بعد ازاں سینٹ لارنس کالج گھوڑا گلی مری، ایچیسن کالج لاہور اور 1965ء میں گورنمنٹ کالج لاہور سے تاریخ میں ماسٹرز کی ڈگری حاصل کی۔

میر ظفر اللہ جمالی سابق صدر پرویز مشرف کے دور حکومت میں وزیراعظم پاکستان منتخب ہوئے تھے، وہ 2002ء سے 2004ء تک اس عہدے پر رہے۔ انہوں نے تقریباً 55 برس قبل سیاسی کیرئیر کا آغاز تھا، وہ پاکستان ہاکی فیڈریشن کے صدر بھی رہ چکے ہیں۔

میر ظفر اللہ جمالی نے اپنے سیاسی کیریئر کا آغاز پیپلزپارٹی کی حمایتی کی حیثیت سے کیا بعدازاں وہ مسلم لیگ نواز میں شامل ہوگئے تھے، وہ دو مرتبہ بلوچستان کے نگراں وزیراعلیٰ بھی رہے، انہوں نے 1999ء میں نواز شریف کی حکومت کا تختہ الٹنے اور شریف خاندان کی جلاوطنی کے بعد مسلم لیگ ق میں شمولیت اختیار کر لی تھی۔

میر ظفر اللہ جمالی نے پہلی بار 1970ء کے عام انتخابات میں حصہ لیا تاہم ناکام رہے، وہ پہلی مرتبہ 1977ء میں بلوچستان اسمبلی کے رکن منتخب ہوئے۔

سابق وزیراعظم پاکستان پیپلزپارٹی، آزاد پاکستان مسلم لیگ، اسلامی جمہوری اتحاد، پاکستان مسلم لیگ ن اور مسلم لیگ ق کا حصہ رہے، وہ حالیہ دنوں میں پاکستان تحریک انصاف کا حصہ تھے۔

مشرف دور کے بعد میر ظفر اللہ خان جمالی ن لیگ میں شامل ہوئے اور پھر 2018 میں تحریک انصاف میں بھی شامل ہوئے۔ سینئر سیاستدان کئی مرتبہ رکن قومی اسمبلی اور سینیٹر منتخب ہونے میں کامیاب رہے۔