گڑھی خدا بخش میں سابق وزیرِ اعظم محترمہ بے نظیر بھٹو شہید کی برسی کے موقع پرپی ڈی ایم کے جلسے کا آغاز ہو گیا ہے۔

تفصیلات کے مطابق مسلم لیگ ن کی مرکزی نائب صدر اور سابق وزیراعظم نواز شریف کی صاحبزادی مریم نواز بھی جلسہ گاہ پہنچ گئیں جہاں چیئرمین پی پی پی بلاول بھٹو زرداری نے ان کا استقبال کیا۔

چیئرمین پاکستان پیپلز پارٹی بلاول بھٹو زرداری نے جلسہ گاہ میں جمعیت علمائے اسلام ف کے رہنما مولانا عبدالغفور حیدری اور دیگر رہنماؤں کا استقبال بھی کیا۔

واضح رہےکہ سابق وزیراعظم شہید بینظیر بھٹو کی 13 ویں برسی کے موقع پر پاکستان پیپلز پارٹی پیپلز پارٹی نے گڑھی خدا بخش میں جلسے کا انعقاد کیا ہے ، جس میں کارکنوں اور رہنماؤں کی آمد کا سلسلہ بھی جاری ہے۔

 شہید محترمہ بینظیر بھٹو کی برسی کے موقع پر آج ہونے والے جلسے میں شرکت کے لیےپاکستان مسلم لیگ ن کا 9 رکنی وفد مسلم لیگ ن کی مرکزی نائب صدر اور سابق وزیراعظم نواز شریف کی صاحبزادی مریم نواز کی سربراہی میں نوڈیرو میں بھٹو ہاوس پہنچا ۔

چئیرمین بلاول بھٹو زرداری، آصفہ بھٹو زرداری،  فریال تالپور اور شیری رحمان نے لیگی وفد کا استقبال کیا۔

گڑھی خدا بخش بھٹو میں مزار کے احاطے میں وسیع اسٹیج سجایا گیا ہے ،  100 فٹ چوڑے اور 40 فٹ اونچے بڑے اسٹیج پر جدید ایل ای ڈی اسکرین بھی نصب کی گئی ہیں۔

چیئرمین پاکستان پیپلز پارٹی بلاول بھٹو زرداری، مسلم لیگ ن کی نائب صدر مریم نواز اور پی ڈی ایم کے دیگر رہنما بھی جلسے سے خطاب کریں گے۔

پاکستان پیپلز پارٹی کے شریک چیئرمین اور سابق صدر آصف علی زرداری کا خطاب ویڈیو لنک کے ذریعے ہو گا۔

لاڑکانہ: پاکستان مسلم لیگ ن کا نو رکنی وفد مریم نواز کی سربراہی میں نوڈیرو میں بھٹو ہاوس پہنچ گیا

لاڑکانہ: چئیرمین بلاول بھٹو زرداری، آصفہ بھٹو زرداری، بی بی فریال تالپور اور شیری رحمان نے لیگی وفد کا استقبال کیا@BBhuttoZardari @MaryamNSharif @AseefaBZ pic.twitter.com/AQRfId62n9

— PPP (@MediaCellPPP) December 26, 2020

جلسے میں پی ڈی ایم کے سربراہ مولانا فضل الرحمٰن  شریک نہیں ہوئے۔

ذرائع کے مطابق آج صبح کے وقت لاڑکانہ میں مزارکے تمام مرکزی گیٹس بند کر دئے گئے تھے، تاہم جیالوں نے گیٹس کھولنے کا مطالبہ  کرتے ہوئے مرکزی گیٹ پر نعرے بازی بھی کی۔

صرف یہی نہیں بلکہ گڑھی خدا بخش بھٹو میں بغیر ماسک کے جیالوں کی دھکم پیل بھی دیکھی گئی۔

ذرائع کے مطابق برسی پر سیکیورٹی کے خصوصی انتظامات  کیے گئے ہیں،سیکورٹی کے لئے 7 ہزار پولیس اہلکار فرائض انجام دیں گے ۔

 دو سو خواتین پولیس اہلکار بھی سیکیورٹی ڈیوٹی پر مامور ہیں ،سیکورٹی کے ساتھ ساتھ بم ڈسپوزل اسکواڈ یونٹ بھی موجود ہے۔

قانون نافذ کرنے والے اداروں کے سادہ لباس اہلکار بھی جلسہ گاہ میں موجود ہونگے۔

برسی کے جلسے میں شریک ہونے والے افراد کو جامع تلاشی کے بعد داخلے کی اجازت ہوگی۔

یاد رہےکہ بے نظیر بھٹو 21 جون 1953میں پیدا ہوئیں اور محترمہ بے نظیر ذوالفقار علی بھٹواور بیگم نصرت بھٹو کی سب سے بڑی بیٹی تھیں۔

جلا وطنی کے بعد 2007 میں بے نظیر بھٹو کراچی واپس آئیں جہاں ان کے قافلے پر حملہ کیا گیا جس کے نتیجے میں درجنوں افراد ہلاک ہو گئے تاہم حملے میں بے نظیر بھٹو محفوظ رہیں لیکن 27 دسمبر 2007 میں راولپنڈی کے لیاقت باغ میں قاتلانہ حملے میں شہید ہو گئیں تھی۔