وفاقی وزیرتعلیم کا کہنا ہے کہ حالات بہتر ہوتے ہی تعلیمی ادارے کھول دیئے جائیں گے، بچوں کو خطرے میں نہیں ڈالنا چاہتے۔

تفصیلات کے مطابق وفاقی وزیرتعلیم شفقت محمود نے تعلیمی اداروں کو چھٹیاں دینے کا فیصلہ درست قرار دیتے کو اپنے تازہ ترین بیان میں کہا ہے کہ بچے گھروں میں رہ کر محفوظ ہیں، حالات بہتر ہوتے ہی تعلیمی ادارے کھول دیے جائیں گے۔

 عالمی وبا کورونا وائرس کے پیش نظر ملک بھر میں تعلیمی ادارے بند ہیں، وائرس کے کیسز میں اضافے کو مدنظر رکھتے ہوئے حکومت کے تعلیمی ادارے کو بند کرنے کے فیصلوں کو بھی سراہا جارہا ہے۔

وفاقی وزیر تعلیم نے خود بھی تعلیمی اداروں کو چھٹیاں دینے کا فیصلہ درست قرار دے دیا ہے۔

شفقت محمود کا مزید کہنا ہے کہ کسی صورت بچوں کی زندگی کو خطرے میں نہیں ڈالا جائے گا، حالات کا جائزہ لے رہے ہیں، بچوں کی جانیں عزیز ہیں، حالات جیسے ہی بہتر ہوجائیں تعلیمی ادارے بھی کھل جائیں گے۔

دوسری جانب پرائیویٹ اسکولز ایسوسی ایشنزکی جوائنٹ ایکشن کمیٹی نے 11 جنوری سے اسکول ہر صورت کھولنے کا اعلان کر دیا ہے۔

صدر پرائیویٹ اسکولز ایسوسی ایشنز کا کہنا ہے کہ سب کی متفقہ رائے سے راولپنڈی اسلام آباد میں اسکولز کھولنے کا فیصلہ کیا گیا ہے۔

 راولپنڈی اسلام آباد میں پرائیویٹ اسکولز میں نصابی سرگرمیاں 11جنوری سے  شروع ہو نگی۔

اس سلسلے میں گزشتہ روز کی گئی پریس کانفرنس میں کہا گیا کہ سپریم کونسل بنائی گئی ہے، جس میں مزید فیصلے کیے جائیں گے، اگر 11جنوری کے بعد اسکولز کھولنے پر حکومتی کارروائی ہوئی تو اس پر سخت احتجاج کرینگے۔

صدر پرائیویٹ اسکولز ایسوسی ایشنز نے موقف اپنایا کہ سب کچھ کھلا ہے توتعلیمی ادارے کیوں بند کیے جارہے ہیں، ایس اوپیز پر مکمل عمل درآمد کیا جائے گا۔