پاکستان پیپلز پارٹی کے چیئر مین بلاول بھٹو زرداری  کا کہناہے کہ  وزیر اعظم  عمران خان سے استعفیٰ چھین کر لیں گے۔

لاہور میں میڈیا سے گفتگو کرتے ہوئے  پاکستان پیپلز پارٹی کے چیئر مین بلاول بھٹو زرداری   نے کہا کہ  آج دلاوربٹ کے خاندان سے تعزیت کے لیے آئے تھے۔دلاور بٹ پیپلز پارٹی کا جیالا تھا جو  لاہور کی لاوارث عوام کا نمائندہ بن کر ان کو ہم سے جوڑتا تھا۔

بلاول بھٹو نے  کہا کہ  ہم لاہور کی نئی جنریشن میں پیپلز پارٹی کا جیالے بنائیں گے۔

حکومت پر تنقید کرتے ہوئے انہوں نے کہا کہ  حکومت زمینی حقائق سے واقف نہیں ہے۔ لوگوں کو دو وقت کی روٹی نہیں ملتی،  کٹھ پتلی وزیر اعظم کے پاس اس کا جواب نہیں ہے۔

چیئر مین پیپلز پارٹی نے کہا کہ  وزیراعظم کے پاس عوام کا مسائل کا حل نہیں تو ان کو استعفیٰ  دے دینا چاہیے۔ ہمارے پاس ایسے منصوبے ہیں جن سے عوام کے مسائل حل کرسکتے ہیں۔

بلاول بھٹو نے کہا کہ  پیپلز پارٹی نے مشکل حالات کے باوجود بے نظیر انکم سپورٹ پروگرام دیا۔ عوام کو بتایا کہ ریاست ان کے ساتھ کھڑی ہے۔ اب حال یہ ہے کہ آٹا پنجاب کے کسان سے نہیں باہر سے خرید رہے ہیں۔

انہوں نے کہا کہ  وزیراعظم کو لانگ مارچ کا اندازہ نہیں ہے۔ لانگ مارچ پر غریب اور بے روزگار عوام کو ساتھ لے کر جائیں گے۔

چیئر مین پیپلز پارٹی کا کہنا تھا کہ  پی ڈی ایم کے حکومت سے کوئی مذاکرات نہیں چل رہے۔ وزیراعظم کو جانا ہے ،جب ہم اسلام آباد پہنچیں  گے تو ان کو جانا ہے، ہم وزیراعظم سے استعفیٰ چھین کر لیں گے۔ہم آئین کے ساتھ ہےآئین میں ترمیم کا ایک طریقہ کار ہے۔

بلاول بھٹو نے کہا کہ   شہبازشریف سے ملاقات میں اتحاد کی بات پر زور دیا گیا۔ شہبازشریف سے ہونے والی ملاقات کے بارے میں غلط خبریں چلائی گئیں۔ ملاقات کے وقت کیمرے لگے تھے اور دیگر لوگ بھی تھے، تعزیت کے ماحول میں زیادہ باتیں نہیں ہوسکتیں۔