وزیراعظم  عمران خان نے  اپوزیشن کو مذاکرات کی دعوت دے دی۔

پشاور میں میڈیا سے  گفتگو کرتے ہوئے  وزیر اعظم عمران خان  نے کہا کہ  اپوزیشن کومذاکرات کی دعوت دی ہے۔ہم  نے کب کہا کہ مذاکرات کے لیے تیار نہیں،  یہ منافقت کرتے ہیں کہ انہوں نے این آر او نہیں مانگا۔

عمران خان نے  نوازشریف کو ڈاکو قرار دیتے ہوئے کہا کہ   ڈاکو لندن جا کر بیٹھ گیا ہے ،وہ وہاں شاپنگ کر رہا اور کھانے کھا رہا ہے۔ وہ لوگوں کو کہتا ہے کہ میری چوری بچانے لیے باہر نکلو،کیا عوام بے وقوف ہے؟

ان کا کہنا تھا کہ  جو عوام کو بیوقوف سمجھتا ہے اس سے بڑا کوئی بے وقوف نہیں ہے۔

وزیر اعظم نے کہا کہ  میں ان سے بہتر کپتان ہوں اور بہتر کھیلنا جانتا ہوں،  سینیٹ الیکشن میں یہ تمام ناکام ہو جائیں گے۔

عمران خان کا مزید کہنا تھا کہ سب جانتے ہیں کہ سینیٹ الیکشن میں پیسہ چلتا ہے،  جمہوریت کہتی ہے کہ سینیٹ الیکشن شو آف ہینڈ سے ہونے چاہئیں۔ ہم چاہیں تو ان سے زیادہ سینیٹرز بنا سکتے ہیں،  ملک کے لیے یہ بہتر نہیں کہ پیسے دیکر سینیٹرز بنائے جائیں۔

انہوں نے کہا کہ  وزیراعظم بنتے ہی کہا تھا کہ یہ سب اکٹھے ہو جائیں گے۔اپوزیشن کے مفادات پاکستان کے مفادات سے متضاد ہیں۔ یہ چاہتے ہیں کہ نیب ختم ہو اور ان کے کیسز ختم ہو جائیں۔ میرا سوال یہ ہے کہ پھر جیلوں میں موجود عام لوگوں کا کیا قصور ہے؟

وزیر اعظم نے کہا کہ  جیلوں میں موجود لوگوں نے لاکھوں کی چوریاں کیں جبکہ ان لوگوں نے اربوں روپے کے ڈاکے ڈالے۔ کچھ لوگ جیلوں میں ہی مر جاتے ہیں، غریب لوگوں کے کیسز کی تاریخ ہی نہیں لگتی۔

عمران خان نے کہا کہ یہ مجھے بلیک میل کرنا چاہتے ہیں،  اپوزیشن کی حکمت عملی کبھی کامیاب نہیں ہو گی۔میں نے تو کہا تھا ملتان میں بھی جو کرنا چاہتے انہیں کرنے دیں۔

ان کا کہنا تھا کہ  میرا ایک جلسہ ان کے دس جلسوں پہ بھاری ہو گا۔ میں جلسہ پاکستانی عوام کے فائدے کے لیے کرتا  ہوں، یہ اپنی چوری بچانے کے لیے جلسے کرتے ہیں۔ لکھ کر دیتا ہوں کہ عوام کبھی بھی چوروں کے لیے باہر نہیں نکلے گی۔

وزیر اعظم نے کہا کہ  پاکستان میں اتنے اسپتال نہیں جتنے ہونے چاہئیں اور ہمارے پاس اتنے پیسے نہیں کہ اتنے اسپتال بنا سکیں۔  پرائیویٹ سیکٹر سے کہتا ہوں وہ اسپتال بنائیں۔

وزیراعظم  نے اسپتال بنانے والوں کو سستی زمین دینے کا اعلان کرتے ہوئے کہا کہ اسپتالوں بنانے کے لیے باہر سے درآمد سامان پر کوئی ڈیوٹی عائد نہیں کی جائے گی۔پاکستان کے چھوٹے شہروں میں بھی اسپتالوں کا جال پھیل جائے گا۔

عمران خان نے کہا کہ کورونا سے آج 100 سے زائد اموات ہوئیں۔