پاکستان ڈیمو کریٹ موومنٹ کے سربراہ مولانا فضل الرحمن نے اتحاد کی سربراہی چھوڑنے کی دھمکی دیدی۔

ذرائع کے مطابق حکومت مخالف اپوزیشن کے اتحاد پی ڈی ایم میں اختلافات کھل کر سامنے آگئے ہیں، مولانا فضل الرحمن نے سا بق صدر آصف زرداری اورسابق وزیراعظم  نواز شریف کواپنے خدشات سے آگاہ کردیا۔

مولانا نے شکوہ کیا ہے کہ اگر بلاول اور مریم نے خود فیصلے کرنے ہیں تو انہیں سربراہی کیوں دی گئی۔

ان کا کہنا ہے کہ بلاول اور مریم اتحاد کے فیصلے تنہا کررہے ہیں دیگر جماعتوں کے رہنمائوں کے بھی خدشات ہیں۔

 پی ڈی ایم سربراہ نے یہ بھی شکوہ کیا کہ ضمنی الیکشن میں حصہ لینے کا اعلان، پی ڈی ایم کو اعتماد میں لیے بغیر کیا گیا ، سینیٹ الیکشن میں حصہ لینے کا اعلان میڈیا میں کیا گیا۔

مولانافضل الرحمن کا موقف ہے کہ پیپلز پارٹی اور ن لیگ اپنے فیصلے پی ڈی ایم پر مسلط کر رہے ہیں ، طے ہوا تھا کہ ہر فیصلہ پی ڈی ایم میں شامل جماعتوں کی مشاورت سے ہوگا۔

مولانا فضل الرحمن نے نوازشریف اورآصف زرداری سے گلہ کیاکہ چھوٹی جماعتوں کو خدشات ہیں کہ پیپلز پارٹی اور ن لیگ انہیں استعمال کر رہی ہیں۔

دوسری جانب آصف زرداری اور نواز شریف کی مولانا فضل الرحمن سے گفتگوہوئی اور انھوں نے کہاکہ اتحاد برقرار رہنا چاہیے۔

دونوں قائدین نے پی ڈی ایم کے سربراہ سے کہاکہ آپ کی شخصیت ہی ان حالات میں پی ڈی ایم کو آگے لیکر چل سکتی ہے ، آئندہ آپکو شکایت نہیں ملے گی، ہر فیصلہ مشاورت سے ہوگا۔